സംസ്ഥാനത്ത് പുതിയ നിപ്പ കേസുകളില്ലെന്നു ആരോഗ്യ മന്ത്രി വീണ ജോർജ്. ഇന്ന് പരിശോധന ഫലംവന്ന 11 സാമ്പിളുകൾ നെഗറ്റീവ് ആണെന്നും മന്ത്രി പറഞ്ഞു. ഇതുവരെ ആകെ 94 സാമ്പിളുകളുടെ ഫലം നെഗറ്റീവ് ആണ്. മെഡിക്കൽ കേളേജിലെ ഐസൊലേഷനിൽ 21 പേർ ഉണ്ടെന്നും വീണ ജോർജ് വ്യക്തമാക്കി. നിപ്പ പോസിറ്റീവ് ആയിട്ടുള്ള ആശുപത്രികളിൽ മെഡിക്കൽ ബോർഡുകൾ നിലവിൽ വന്നതായും ആരോഗ്യ മന്ത്രി അറിയിച്ചു. ഐഎംസിഎച്ചിൽ രണ്ടു കുട്ടികൾ കൂടി ചികിത്സയിൽ ഉണ്ടെന്നും ആദ്യം മരിച്ച വ്യക്തിയുടെ കുട്ടി ഇപ്പോൾ വെന്റിലേറ്ററിൽ ആന്നെന്നും ഇപ്പോൾ ആരോഗ്യസ്ഥിതിയിൽ പുരോഗതിയുണ്ടെന്നും മന്ത്രി പറഞ്ഞു. കോഴിക്കോട് ചേർന്ന ആരോഗ്യ വിദഗ്ധരുടെ യോഗത്തിനു ശേഷം മാധ്യമങ്ങളോട് പ്രതികരിക്കുകയായിരുന്നു മന്ത്രി. മെഡിക്കൽ ബോർഡിന്റെ റിപ്പോർട്ട് പ്രകാരം നിലവിൽ ചികിത്സയിലുള്ളവരുടെ ആരോഗ്യ നില തൃപ്തികരമാണെന്ന് മന്ത്രി പറഞ്ഞു. രോഗികളെ എത്തിക്കുന്നതിന് കൂടുതൽ ആംബുലൻസുകൾ നിയോഗിച്ചിട്ടുള്ളതായും മറ്റു ജില്ലകളിലെ സാമ്പിൾ ശേഖരണം ഇന്ന് തന്നെ പൂർത്തിയാവുമെന്നും ആരോഗ്യമന്ത്രി അറിയിച്ചു. സംസ്ഥാനത്തിന്റെ പ്രതിരോധ പ്രവർത്തങ്ങൾ കേന്ദ്രസംഘം പ്രശംസിച്ചതായും മന്ത്രി വ്യക്തമാക്കി.
2023-09-16