കരുവന്നൂർ ബാങ്ക് തട്ടിപ്പുമായി ബന്ധപ്പെട്ട കേസിന്റെ അന്വേഷണത്തിൽ എ.സി. മൊയ്തീൻ എംഎൽഎ എൻഫോഴ്സ്മെന്റ് ഡയറക്ടറേറ്റിനോട് (ഇഡി) സഹകരിക്കണമെന്ന് കേന്ദ്രമന്ത്രി വി.മുരളീധരൻ. കേന്ദ്രം വേട്ടയാടുന്നുവെന്ന പതിവ് ആരോപണവുമായി സിപിഎം സംസ്ഥാന സെക്രട്ടറി എം.വി.ഗോവിന്ദൻ വരരുതെന്നും മുരളീധരൻ ആവശ്യപ്പെട്ടു.
ബലിയാടാക്കി എന്ന് ഇനി പറയുന്നതിൽ കാര്യമില്ല. സംസ്ഥാന നേതൃത്വം അഴിമതിക്കു കൂട്ടുനിന്നുവെന്ന് ബാങ്ക് ഡയറക്ടർ തന്നെ പറഞ്ഞ സ്ഥിതിക്ക് ഇനി കേന്ദ്രത്തെ കുറ്റം പറയാനാകില്ല. അന്വേഷണവുമായി സഹകരിച്ചില്ലെങ്കിൽ പാവപ്പെട്ട ജനങ്ങളുടെ ജീവിതം തകർത്ത പാർട്ടി എന്ന് ജനം ഈ പാർട്ടിയെ വിലയിരുത്തുമെന്നും വി.മുരളീധരൻ പറഞ്ഞു. മന്ത്രിസഭാ പുനസംഘടനയുമായി ബന്ധപ്പെട്ടും അദ്ദേഹം പ്രതികരണം നടത്തി. സർക്കാർ നടത്തുന്ന തട്ടിപ്പിൽ നിന്നും കിട്ടുന്ന തുക കൂടുതൽ പേർക്ക് വീതം വയ്ക്കാനാണ് രണ്ടര വർഷം കൂടുമ്പോൾ മന്ത്രിസഭാ വികസിപ്പിക്കുന്നത് എന്നും അദ്ദേഹം പറഞ്ഞു
പുത്തൂരിൽ ബിജെപി സംസ്ഥാന നേതൃയോഗം ഉദ്ഘാടനം ചെയ്ത് സംസാരിക്കവേയാണ് അദ്ദേഹം ഇക്കാര്യങ്ങൾ വ്യക്തമാക്കിയത്.