മന്ത്രിസഭാ പുനസംഘടന : മന്ത്രി സ്ഥാനത്തേക്കുള്ള പിടിവലിയുമായി എംഎൽഎമാർ

മന്ത്രിസഭാ പുനസംഘടന ഉണ്ടാവും എന്ന വാർത്തക്ക് പിന്നാലെ ഇപ്പോൾ മന്ത്രി സ്ഥാനത്തിനായി എംഎൽഎമാർ തമ്മിലുള്ള പിടിവലിയുടെ വാർത്തകളാണ് പുറത്തുവരുന്നത്.
കുട്ടനാട് എംഎൽഎ തോമസ് കെ തോമസ് മന്ത്രി സ്ഥാനം ആവശ്യപ്പെട്ടു. മന്ത്രിസഭാ പുനസംഘടന എൻസിപിക്കും ബാധകമാണെന്ന് അദ്ദേഹം പറഞ്ഞു. മന്ത്രിസ്ഥാനവുമായി ബന്ധപ്പെട്ട കാര്യങ്ങൾ ചർച്ച ചെയ്യാൻ ശരത് പവാറുമായി കൂടിക്കാഴ്ച നടത്തുമെന്നും അദ്ദേഹം കൂട്ടിച്ചേർത്തു. കോവൂർ കുഞ്ഞുമോൻ എംഎൽഎയും മന്ത്രി സ്ഥാനം ആവശ്യപ്പെട്ട് എൽഡിഎഫിന് കത്തയച്ചതായി അറിയിച്ചു . സീനിയർ എംഎൽഎ എന്ന അവകാശവാദം ഉന്നയിച്ചാണ് മന്ത്രി സ്ഥാനം ആവശ്യപ്പെട്ടിരിക്കുന്നത്. 5 തവണ എംഎൽഎ ആയ തന്നെ മന്ത്രിയാക്കണം എന്നാണ് കോവൂരിന്റെ ആവശ്യം. അതേസമയം കെപി മോഹനനെ മന്ത്രിയാക്കണമെന്ന ആവശ്യം ഉന്നയിച്ച് എൽഡിജെയും മാത്യു ടി തോമസിനായി ജെഡിഎസിലെ ഒരു വിഭാഗവും രംഗത്തെത്തിയിട്ടുണ്ട്.
പിണറായി സർക്കാരിന്റെ രണ്ടര വർഷം തികയുന്നതിനോടനുബന്ധിച്ച് മന്ത്രി സഭപുനസംഘടിപ്പിക്കും എന്ന റിപ്പോർട്ട്‌ പുറത്ത് വന്നിരുന്നു. വീണാ ജോർജ്, ആന്റണി രാജു ഉൾപ്പെടെയുള്ളവർ മാറും എന്നും പുറത്ത് വന്ന റിപ്പോർട്ടിൽ പറയുന്നുണ്ട്. അതിനിടെയാണ് എംഎൽഎമാർ തമ്മിൽ മന്ത്രിസ്ഥാനത്തേക്കുള്ള പിടിവലി.