തൃശ്ശൂർ: തൃശ്ശൂർ എടുക്കുമെന്നല്ല താൻ പറഞ്ഞതെന്ന് നടൻ സുരേഷ് ഗോപി. നിങ്ങൾ തന്നാൽ താൻ സ്വീകരിക്കുമെന്നാണ് പറഞ്ഞതെന്നും അദ്ദേഹം പറഞ്ഞു. ടാസ് നാടകോത്സവം ഉദ്ഘാടനം ചെയ്ത് സംസാരിക്കവെയായിരുന്നു അദ്ദേഹത്തിന്റെ പരാമർശം.
‘തൃശൂർ ഞാനിങ്ങ് എടുക്കുവാ.. തൃശൂർ നിങ്ങൾ എനിക്ക് തരണം.. ‘ എന്ന സുരേഷ് ഗോപിയുടെ വാക്കുകൾ ഏറെ ചർച്ചയായിരുന്നു. ലോക്സഭാ തെരഞ്ഞെടുപ്പ് പ്രചാരണത്തിനായി തൃശൂരിൽ എത്തിയപ്പോഴായിരുന്നു സുരേഷ് ഗോപി ഈ പരാമർശം നടത്തിയത്. സത്യസന്ധമായി നാടകം ചെയ്യുമ്പോൾ ദൈവങ്ങളെ വിമർശിക്കേണ്ടിവന്നേക്കുമെന്നും അതിനുള്ള സഹിഷ്ണുത തനിക്കുണ്ടെന്നും എന്നാൽ, പ്രത്യേക ലക്ഷ്യത്തോടെ ചെയ്യുമ്പോഴാണ് പ്രശ്നമെന്നും സുരേഷ് ഗോപി അറിയിച്ചു.
ശമ്പളം വാങ്ങി എഴുതി രാഷ്ട്രീയാതിപ്രസരമുള്ള രചനകളിലൂടെ ജനങ്ങളെ തെറ്റിദ്ധരിപ്പിക്കാൻ ശ്രമിച്ചേക്കാം. സിനിമയെക്കാൾ നാടകത്തിനാണ് സ്വാധീനശേഷിയെന്നും 14 ജില്ലകളിലും നാടകങ്ങളും വിതരണക്കമ്പനികളും ഉണ്ടാകണമെന്നും സുരേഷ് ഗോപി അഭിപ്രായപ്പെട്ടു.