ബെംഗളൂരു : ഇന്ത്യയുടെ ചാന്ദ്ര ദൗത്യമായ ചന്ദ്രയാൻ -3 വിജയകരമായി പൂർത്തിയായതോടെ ഐ എസ് ആർ ഒ അടുത്ത ബഹിരാകാശ ദൗത്യത്തിലേക്ക് കടക്കുന്നു. ഇന്ത്യയുടെ ആദ്യ സൗര ദൗത്യമായ ആദിത്യ -എൽ 1 സെപ്റ്റംബർ 2 ന് വിക്ഷേപിച്ചേക്കും. പ്രധാന മന്ത്രിയുടെ ബംഗളുരുവിലെ ഐ എസ് ആർ ഒ ആസ്ഥാനത്തെ ശാസ്ത്രജ്ഞരുമായുള്ള കൂടി കാഴ്ചയ്ക്ക് ശേഷമായിരുന്നു പുതിയ പദ്ധതിയുടെ പ്രഖ്യാപനം.
ഐ എസ് ആർ ഒ യിലെ ശാസ്ത്രജ്ഞനും അഹമ്മദാബാദിലെ സ്പേസ് ആപ്ലിക്കേഷൻ സെന്റർ ഡയറക്ടറുമായ നിലേഷ് എം ദേശായിയാണ് ഇക്കാര്യം വ്യക്തമാക്കിയത്. സുര്യനെ കുറിച്ച് പഠിക്കുന്നതിനുള്ള ആദിത്യ -എൽ 1 വിക്ഷേപണത്തിന് സജ്ജമാണെന്നും സെപ്തംബർ 2 ന് വിക്ഷേപിക്കുമെന്നാണ് അദ്ദേഹം പറഞ്ഞത്. പ്രധാനമന്ത്രി ശാസ്ത്രജ്ഞരോട് പറഞ്ഞ വാക്കുകൾ ഏറെ പ്രചോദനം തരുന്നതും രാജ്യത്തിന് വേണ്ടി പ്രവർത്തിക്കുന്നതിനാവശ്യമായ തീക്ഷ്ണത തരുന്നതും ആണെന്നായിരുന്നു നിലേഷ് പറഞ്ഞത്.