ദുൽഖർ സൽമാൻ നായകനാകുന്ന പാൻ ഇന്ത്യൻ ചിത്രമാണ് കിംഗ് ഓഫ് കൊത്ത. ചിത്രത്തിൽ നായികയായെത്തുന്നത് ഐശ്വര്യ ലക്ഷ്മിയാണ്. ഈ സിനിമയിലെ കലാപകാരാ എന്ന ഗാനം ഇതിനോടകം ഹിറ്റായി കഴിഞ്ഞു. കഴിഞ്ഞ ദിവസം സിനിമയിലെ നായികയായ ഐശ്വര്യ ലക്ഷ്മി ദുൽഖറിനൊപ്പം ആരാധകരോട് സംസാരിക്കവെയാണ് ഓരോ കഥാപാത്രങ്ങളെയും കുറിച്ച് വാചാലയായത്. കിംഗ് ഓഫ് കൊത്ത ഗ്യാങ്സ്റ്റർ സിനിമയാണെങ്കിലും അതിന്റെ കഥ എത്ര നന്നായി എഴുതി എന്നതിലാണ് ഊന്നൽ നൽകേണ്ടതെന്നാണ് നടി പറയുന്നത്.
സിനിമയിൽ നിരവധി കഥാപാത്രങ്ങളുള്ളതിനാൽ ഓരോ കഥാപാത്രങ്ങളുടെയും പെർഫെക്ഷൻ നിർണായകമായ കാര്യമാണ്. ഇക്കാര്യം നന്നായി ചിത്രത്തിൽ സംയോജിപ്പിച്ചിട്ടുണ്ടെന്നും നടി വ്യക്തമാക്കി. മലയാളത്തിലെ പ്രമുഖ സംവിധായകനായ ജോഷിയുടെ മകൻ അഭിലാഷ് ജോഷിയാണ് സിനിമ സംവിധാനം ചെയ്യുന്നത്. ദുൽഖർ സൽമാന്റെ കരിയറിലെ തന്നെ ഏറ്റവും പ്രധാനപ്പെട്ട ഈ ചിത്രം മലയാള സിനിമയിൽ ചരിത്രമാകുമെന്നാണ് ആരാധകർ പ്രതീക്ഷിക്കുന്നത്.