തെന്നിന്ത്യൻ ഭാഷകളിൽ ഒട്ടേറെ മലയാളി താരങ്ങൾ അഭിനയിച്ചിട്ടുണ്ട്. എന്നാൽ സജീവമായി അന്യ ഭാഷ ചിത്രങ്ങൾ അഭിനയിക്കുന്ന താരങ്ങൾ മോളിവുഡിലില്ല. മലയാളത്തിലിപ്പോൾ അങ്ങനെയൊരു താരം ഉണ്ടെങ്കിൽ അത് ദുൽഖർ മാത്രമായിരിക്കും . തന്റെ 11 വർഷത്തെ സിനിമ ജീവിതത്തിലെ കഠിനാധ്വാനമാണ് ദുൽഖറിനെ പാൻ ഇന്ത്യൻ താരമാക്കിയത്. അടുത്തിടെ തെലുങ്കു നടൻ നാനി ദുൽഖറിനെ പറ്റി പറഞ്ഞതാണ് ഇപ്പോൾ ശ്രദ്ധേയമാകുന്നത്. തനിക്കറിയാവുന്ന ഏക പാൻ ഇന്ത്യൻ നടൻ ദുൽഖർ സൽമാനാണെന്ന് പറഞ്ഞിരിക്കുകയാണ് നാനി. ദുൽഖറിന്റെ ഓണചിത്രമായ കിംഗ് ഓഫ് കൊത്തയുടെ കഴിഞ്ഞ ദിവസം നടന്ന പ്രീ റീലീസ് ഇവന്റിലാണ് നാനി ഇക്കാര്യം പറഞ്ഞത്.
‘ഒരു ഹിന്ദി സംവിധായകൻ കഥ എഴുതുമ്പോൾ തമിഴ്, മലയാളം, തെലുങ്ക് സംവിധായകരും ദുൽഖറിന് വേണ്ടികഥ എഴുതുന്നു. പാൻ ഇന്ത്യൻ നടൻ എന്ന വാക്കിന്റെ അർഥം തന്നെ ഇതാണ്’ എന്നായിരുന്നു നാനിയുടെ വാക്കുകൾ. ഓഗസ്റ്റ് 24 നാണ് കിംഗ് ഓഫ് കൊത്ത റിലീസാവുന്നത്. അഭിലാഷ് ജോഷി സംവിധാനം നിർവഹിക്കുന്ന ചിത്രത്തിൽ ഷബീർ കല്ലറയ്ക്കൽ, ഗോകുൽ സുരേഷ് , ഷമ്മി തിലകൻ , നൈല ഉഷ , പ്രസന്ന, ചെമ്പൻ വിനോദ് , ശാന്തി കൃഷ്ണ തുടങ്ങിയ താരങ്ങൾ അണി നിരക്കുന്നുണ്ട്.