പാക് സർക്കാരിനെതിരെ മുൻ പിസിബി ചെയര്മാൻ ഖാലിദ് മഹ്മൂദ്. ഏകദിന ലോകകപ്പിൽ പാകിസ്ഥാൻ കളിക്കണോ വേണ്ടയോ എന്ന് തീരുമാനിക്കാൻ പാക് സർക്കാർ ഉന്നതതല സമിതിയെ നിയോഗിച്ചതിനു പിന്നാലെയാണ് പാക് സർക്കാരിനെതിരെ ഖാലിദ് രംഗത്തിറങ്ങിയത്. പാക്കിസ്ഥാൻ സർക്കാരിന്റേത് യുക്തിക്കു നിരക്കാത്ത തീരുമാനമാണെന്ന് ഖാലിദ് പറഞ്ഞത്.
‘‘പാക്കിസ്ഥാനില് ഇന്ത്യ കളിക്കാൻ വരില്ലെന്നതു യാതൊരു തരത്തിലും ന്യായീകരിക്കാനാകില്ല. പക്ഷേ രാജ്യാന്തര തലത്തിൽ കാര്യങ്ങൾ കൈകാര്യം ചെയ്യുന്ന രീതി ഇതല്ല. ലോകകപ്പ് കളിക്കുന്ന കാര്യം തീരുമാനിക്കാൻ പാക്കിസ്ഥാൻ മന്ത്രിമാരുടെ സമിതിയെ വച്ചത്, രാഷ്ട്രീയവും സ്പോർട്സും കൂട്ടിക്കുഴയ്ക്കരുതെന്ന സർക്കാർ നയത്തിനു വിരുദ്ധമാണ്. ഇന്ത്യയിലേക്ക് ടീമിനെ അയക്കുന്നതിനു മുൻപ് സുരക്ഷാ സംഘം പരിശോധിക്കുമെന്നു പറയുന്നതിൽ തെറ്റില്ല.’’- ഇങ്ങനെയായിരുന്നു അദ്ദേഹത്തിന്റെ വാക്കുകൾ.