ഓണസദ്യയില്ലാതെ ഒരു ഓണം മലയാളിയ്ക്ക് ഓർക്കാൻ കൂടി കഴിയില്ല. അത്രയേറെ പ്രാധാന്യമാണ് ഓണസദ്യയ്ക്കുള്ളത്. ഓണസദ്യയിലെ ചില വിഭവങ്ങൾക്ക് അതിന്റേതായ ചില ആരോഗ്യഗുണങ്ങളുണ്ട്. അത് എന്തൊക്കെയാണെന്ന് നോക്കാം.
പരിപ്പും പപ്പടവും നെയ്യും കൂട്ടിയാണ് ഓണസദ്യയിൽ ആദ്യം ചോറ് കഴിക്കാറുള്ളത്. ഇരുമ്പും പൊട്ടാസ്യവും ഇതിൽ ധാരാളമുണ്ട്. പരിപ്പിൽ അടങ്ങിയിട്ടുള്ള പൊട്ടാസ്യം, കാത്സ്യം, മഗ്നീഷ്യം എന്നിവ രക്തസമ്മർദ്ദം നിയന്ത്രിക്കും. നെയ്യിൽ വിറ്റാമിനുകളായ എ,ഡി,ഇ എന്നിവ അടങ്ങിയിട്ടുള്ളതിനാൽ ഇത് കാഴ്ച്ചയ്ക്കും ചർമ്മത്തിനും പ്രായോജനം ചെയ്യും. സദ്യയിലെ മറ്റൊരു പ്രധാനപ്പെട്ട വിഭവമാണ് സാമ്പാർ. വിവിധ തരം പച്ചക്കറികൾ അടങ്ങിയിട്ടുള്ളതിനാൽ ആരോഗ്യപരമായി ഏറെ ഗുണങ്ങൾ ഇതിനുണ്ട്.
ഇഞ്ചിക്കറിയാണ് സദ്യയിലുള്ള മറ്റൊരു പ്രധാന വിഭവം. ഇത് ദഹനത്തെ സഹായിക്കുകയും രോഗപ്രതിരോധ ശേഷി മെച്ചപ്പെടുത്തുകയും ചെയ്യും. വിറ്റാമിൻ എ, ഡി, ഇ, ബി, മഗ്നീഷ്യം, ഫോസ്ഫറസ്, പൊട്ടാസ്യം, കാത്സ്യം തുടങ്ങിയ ഘടകങ്ങളും ഇഞ്ചിയിലുണ്ട്.
വിറ്റമിനുകളാലും മിനറലുകളാലും സമ്പന്നമാണ് അവിയൽ. പലതരത്തിലുള്ള പച്ചക്കറികളും തേങ്ങയും ചേർത്ത് തയ്യാറാക്കുന്ന അവിയൽ ശരീരഭാരം നിയന്ത്രിക്കും. പോഷകക്കുറവ് നികത്താനും അവിയൽ കഴിക്കുന്നത് വളരെ നല്ലതാണ്. സദ്യയിൽ ഒഴിച്ചു കൂടാനാകാത്ത മറ്റ് രണ്ട് ഘടകങ്ങളാണ് മോരും പുളിശ്ശേരിയും. മോരിൽ ധാരാളം കാത്സ്യവും വിറ്റമിൻ ഡിയും ഉണ്ട്. ഇവ രണ്ടും എല്ലുകളുടെ ആരോഗ്യം നിലനിർത്തും.