ചെന്നൈ: സംവിധാന സഹായിക്കെതിരെ മോഷണ പരാതിയുമായി സംവിധായകൻ ദേസിങ് പെരിയസാമി. ദുൽഖർ സൽമാൻ നായകനായ കണ്ണും കണ്ണും കൊള്ളയടിത്താൽ എന്ന സിനിമയുടെ സംവിധായകനാണ് ദേസിങ് പെരിയസാമി. മുഹമ്മദ് ഇഖ്ബാൽ എന്ന സംവിധാന സഹായിക്കെതിരെയാണ് ദേസിങ് പെരിയസാമി പരാതിയുമായി രംഗത്തെത്തിയിരിക്കുന്നത്.
മുഹമ്മദ് ഇഖ്ബാൽ തന്റെ പക്കൽ നിന്നും മൂന്ന് ലക്ഷം രൂപ മോഷ്ടിക്കുകയും ചോദിച്ചപ്പോൾ തന്നെയും ഭാര്യയെയും കൊല്ലുമെന്ന് ഭീഷണിപ്പെടുത്തുകയും ചെയ്തുവെന്ന് ദേസിങ് ആരോപിക്കുന്നു. മുഹമ്മദ് ഇഖ്ബാലായിരുന്നു 2018 മുതൽ തന്റെ കണക്കുകൾ നോക്കിയിരുന്നത്. ഇയാളോട് 150 ഗ്രാമോളം വരുന്ന സ്വർണാഭരണങ്ങൾ അണ്ണാനഗറിലെ സ്വകാര്യ ധനകാര്യ സ്ഥാപനത്തിൽ പണയം വെച്ച് പണം വാങ്ങാൻ ആവശ്യപ്പെട്ടിരുന്നു. എന്നാൽ മുഹമ്മദ് ഇഖ്ബാൽ സ്വർണ്ണം പണയപ്പെടുത്തി ലഭിച്ച മൂന്നുലക്ഷം രൂപ തട്ടിയെടുത്തുവെന്ന് അദ്ദേഹം പരാതിയിൽ പറയുന്നു.
പണം ചോദിച്ചപ്പോൾ തന്നെയും ഭാര്യയെയും കൊല്ലുമെന്ന് ഭീഷണിപ്പെടുത്തിയെന്നും പരാതിയിൽ വ്യക്തമാക്കിയിട്ടുണ്ട്. ദേസിങിന്റെ പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്തതായി അണ്ണാനഗർ പൊലീസ് അറിയിച്ചു. അന്വേഷണം പുരോഗമിക്കുകയാണെന്നും പോലീസ് വ്യക്തമാക്കി.