ഉത്തർപ്രദേശ് മുഖ്യമന്ത്രി യോഗി ആദിത്യ നാഥിന്റെ കാലിൽ തൊട്ട് വന്ദിച്ചത് വിവാദമായതിന് പിന്നാലെ അതിന് മറുപടിയുമായി രജനികാന്ത് രംഗത്തെത്തി. പ്രായമല്ല ബഹുമാനം നൽകാൻ താൻ സ്വീകരിക്കുന്ന മാനദണ്ഡമെന്നും തന്നെക്കാൾ പ്രായം കുറഞ്ഞ യോഗിയെയോ സന്യാസിയെയോ കണ്ടാൽ കാൽ തൊട്ട് വണങ്ങുമെന്നും രജനി പ്രതികരിച്ചു. യോഗിയുടെ കാൽ തൊട്ട് വന്ദിച്ച സംഭവത്തിൽ രാജ്യത്തിന്റെ പലയിടത്ത് നിന്നും രജനിയെ വിമർശിച്ച് ആളുകൾ രംഗത്തെത്തിയിരുന്നു.
ഉത്തർപ്രദേശിലെ മനുഷ്യാവകാശ ലംഘനങ്ങൾ രജനി ഓർക്കാത്തതെന്താണെന്നും തന്നേക്കാൾ പ്രായം കുറഞ്ഞ യോഗിയെ എന്തിന് തൊട്ടു വണങ്ങിയെന്നുമൊക്കെയായിരുന്നു രജനിക്കെതിരെയുള്ള പരസ്യ വിമർശനങ്ങൾ. എന്നാൽ ഒരു കൂട്ടം ആളുകൾ രജനിയെ അനുകൂലിച്ചും അഭിപ്രായങ്ങൾ രേഖപ്പെടുത്തിയിരുന്നു. ഇതോടെയായിരുന്നു യോഗിയെ കാൽ തൊട്ട് വണങ്ങിയ സംഭവത്തിൽ രജനി മാധ്യമങ്ങളോട് പ്രതികരണം നടത്തിയത്. അതെ സമയം രജനികാന്തിന്റെ ജയിലർ സിനിമ 500 കോടി ക്ലബ് കടന്നിരിക്കുകയാണ്. ഈ സമയം രജനി ഉത്തരേന്ത്യയിലെ ക്ഷേത്രങ്ങളിൽ ദർശനം നടത്തി ആത്മീയ പാതയിലാണ്.