പാക്കിസ്ഥാനിലെ പെഷവാറിൽ സ്കൂളിന് സമീപം സ്‌ഫോടനം നടന്നതായി റിപ്പോർട്ട്. കുട്ടികൾ ഉൾപ്പെടെ അഞ്ച് പേർക്ക് പരിക്ക്. സംഭവസ്ഥലത്തെത്തി പൊലീസും രക്ഷാസംഘങ്ങളും അന്വേഷണം ആരംഭിച്ചിട്ടുണ്ട്. സംഭവം നടന്നത് രാവിലെ 9:10 നാണ്. സ്‌ഫോടനമുണ്ടായത് പെഷവാറിലെ വാർസക് റോഡിലെ സ്കൂളിന് സമീപമാണ് എന്ന് മാധ്യമങ്ങൾ റിപ്പോർട്ട് ചെയ്യുന്നു.
സ്‌ഫോടനം ഉണ്ടായത് ഐ.ഇ.ഡി പൊട്ടിത്തെറിച്ചാണ് എന്നാണ് പൊലീസ് പറയുന്നത്. പരിക്കേറ്റ അഞ്ച് പേരിൽ നാല് പേർ കുട്ടികളാണ്. ഇവരുടെ പ്രായം 7 മുതൽ 10 വയസ്സ് വരെയാണ് . രണ്ട് കുട്ടികളുടെ നില അതീവ ഗുരുതരമാണ്. നേരത്തെ 2014ൽ താലിബാൻ ഭീകരർ പെഷവാർ നഗരത്തിലെ സൈനിക സ്കൂളിൽ ആക്രമണം നടത്തിയിരുന്നു. അന്ന് ആക്രമണത്തിൽ കൊല്ലപ്പെട്ടത് 132 കുട്ടികളടക്കം 140 പേരാണ് .