ന്യൂഡല്ഹി: ഇന്ത്യയുടെ പരമോന്നത പദവിയിലെത്തിയതിന് ശേഷം ആദ്യമായി പ്രസിഡന്റ് രാംനാഥ് കോവിന്ദ് ഇന്ന് തന്റെ ജന്മനാട് സന്ദര്ശിക്കും. ജനിച്ച് വളര്ന്ന ഉത്തര്പ്രദേശിലെ കാന്പൂരിലുള്ള പരൗഖിലേക്കാണ് രാംനാഥ് കോവിന്ദ് യാത്ര പോകുന്നത്.
ന്യൂഡല്ഹിയിലെ സഫ്ദര്ജംഗ് റയില്വേ സ്റ്റേഷനില് നിന്ന് ഇന്ന് തിരിക്കുന്ന തീവണ്ടി കാന്പൂരില് തന്നെയുള്ള ജിന്ജാക്ക്, രൂരാ എന്നീ രണ്ട് സ്ഥലങ്ങളില് നിര്ത്തും. തന്റെ ബാല്യകാല സുഹൃത്തുക്കളെ നേരില് കണ്ട് സംസാരിക്കുന്നതിനു വേണ്ടിയാണ് ട്രെയിനിന് ഇവിടെ സ്റ്റോപ്പുകള് അനുവദിച്ചത്.
15 വര്ഷത്തിനിടെ ഇത് ആദ്യമായാണ് ഒരു പ്രസിഡന്റ് ട്രെയിന് യാത്ര നടത്തുന്നത്. ഇതിനു മുമ്പ് മുന് പ്രസിഡന്റ് ആയിരുന്ന ഡോ എ പി ജെ അബ്ദുല് കലാമാണ് അവസാനമായി ട്രെയിനില് യാത്ര നടത്തിയത്.