ദിലീഷ് പോത്തന്‍-ശ്യാം പുഷ്‌കര്‍ – ഫഹദ് ഫാസില്‍ കൂട്ടുകെട്ടിലൊരുങ്ങിയ പുതിയ ചിത്രമാണ് ജോജി. ആമസോണ്‍ പ്രൈമിലൂടെ റിലീസ് ചെയ്ത ചിത്രം മികച്ച പ്രേക്ഷക പ്രതികരണം നേടി മുന്നേറുകയാണ്. ഇപ്പോഴിതാ, ചിത്രത്തെ തേടി ബോളിവുഡില്‍ നിന്നു വരെ പ്രശംസ എത്തിയിരിക്കുകയാണ്. പമുഖ ബോളിവുഡ് നടന്‍ ഗജരാജ് റാവുവാണ് ജോജി എന്ന ചിത്രത്തെ അഭിനന്ദിച്ച് രംഗത്തെത്തിയിരിക്കുന്നത്. വളരെ സരസമായി എഴുതിയിരിക്കുന്ന തുറന്ന കത്താണ് ജോജി ടീമിനായി ബോളിവുഡ് താരം എഴുതിയിരിക്കുന്നത്.നടന്റെ കത്ത് സാനിമാ പ്രേമികളുടെ ഫേസ്ബുക്ക് കൂട്ടായ്മയിലും വൈറലായി മാറിയിട്ടുണ്ട്. കത്തിന്റെ പൂര്‍ണ്ണ രൂപം ഇങ്ങനെയാണ്. പ്രിയപ്പെട്ട ദിലീഷ് പോത്തനും മറ്റ് മലയാളം സിനിമാ സംവിധായകര്‍ക്കും പ്രത്യേകിച്ച് ഫഹദ് ഫാസില്‍ ആന്‍ഡ് ഫ്രണ്ട്‌സിനും എന്ന് കുറിച്ചുകൊണ്ടാണ് കത്തിന്റെ തുടക്കം. താന്‍ ജോജി കണ്ടുവെന്നും ഇക്കാര്യം പറയുന്നതില്‍ തനിക്ക് ഖേദം ഉണ്ടെന്നും താരം കുറിച്ചിരിക്കുന്നു. എന്നാല്‍ പറയാതിരിക്കാനാകുന്നില്ലെന്നും മതിയാക്ക് എന്നും താരം പറയുന്നു. നിങ്ങള്‍ നിരന്തരം യഥാര്‍ത്ഥ ആശയങ്ങളുമായി വരുന്നതും അവ വളരെ ആത്മാര്‍ത്ഥതയോടെ അവതരിപ്പിച്ച് അത് നല്ല സിനിമയാക്കുന്നതും അത്ര ശരിയല്ലെന്നും ബോളിവുഡ് താരം തമാശ രൂപേണ കുറിച്ചിരിക്കുന്നു.മറ്റുള്ള പ്രാദേശിക ചിത്രങ്ങളില്‍ നിന്ന് നിങ്ങള്‍ ഒന്നോ രണ്ടോ കാര്യങ്ങള്‍ പഠിക്കേണ്ടതുണ്ടെന്നും പ്രത്യേകിച്ച് ഇവിടെ ഞങ്ങളുടെ ഹിന്ദിയില്‍ നിന്നാണ് അതെന്നും താരം. നിങ്ങള്‍ ചില സാധാരണ ജോലികളും ചെയ്യേണ്ടതുണ്ടെന്നും മടുപ്പിക്കുന്ന മാര്‍ക്കറ്റിംഗ് കാമ്പെയ്നുകളും പ്രെമോഷനുകളും എവിടെയാണെന്നും ആത്മാവില്ലാത്ത റീമേക്കുകള്‍ എവിടെയാണെന്നും താരം ചോദിക്കുന്നു.വാരാന്ത്യ ബോക്‌സ് ഓഫീസ് കളക്ഷനുകളോടുള്ള ആസക്തി എവിടെയാണെന്നും ഇത് അല്‍പ്പം കടന്ന കൈയ്യാണെന്നും താരം പറഞ്ഞു. ഞാന്‍ ഈ പറഞ്ഞത് ഒന്നും നിങ്ങള്‍ കാര്യമായി എടുക്കില്ലാ എന്നും ഇനിയും നല്ല സൃഷ്ടികള്‍ ഉണ്ടായിക്കൊണ്ടിരിക്കും എന്നും ഞാന്‍ പ്രതീക്ഷിക്കുന്നുവെന്നും താരം ചോദിക്കുന്നു. ഈ മഹാമാരി അവസാനിക്കുമ്പോള്‍ നിങ്ങളുടെ സിനിമകള്‍ ആദ്യ ദിവസം ആദ്യ ഷോ കാണാന്‍ ഒരു പാക്കറ്റ് പോപ്‌കോണുമായി ഞാന്‍ റെഡിയായി ഇരിക്കുമെന്നും അദ്ദേഹം കുറിച്ചു. നടന്റെ കത്തിന് സോഷ്യല്‍ മീഡിയയില്‍ നിറയെ കൈയ്യടികളാണ് ലഭിക്കുന്നത്.
2021-04-16