ആസിഫ് അലിയെ നായകനാക്കി ജിബു ജേക്കബ് ഒരുക്കുന്ന ചിത്രം എല്ലാം ശരിയാകും റിലീസിനൊരുങ്ങുന്നു. സെപ്റ്റംബര് പതിനേഴിന് ചിത്രം തീയേറ്ററുകളിലെത്തിക്കാനാണ് തീരുമാനം. ഈ മാസം നാലിന് റിലീസ് ചെയ്യാനിരുന്ന ചിത്രം കോവിഡ് മൂലം തീയേറ്ററുകള് അടച്ചതോടെ നടക്കാതെ പോകുകയായിരുന്നു. വെള്ളിമൂങ്ങ, മുന്തിരിവള്ളികള് തളിര്ക്കുമ്പോള്, ആദ്യരാത്രി എന്നി ചിത്രങ്ങള്ക്കു ശേഷം ജിബു ജേക്കബ് സംവിധാനം ചെയ്യുന്ന ചിത്രമാണ് ഇത്.
അനുരാഗകരിക്കിന് വെള്ളത്തിന് ശേഷം രജിഷ വിജയന് ആസിഫിന്റെ നായികയാകുന്ന ചിത്രം കൂടിയാണിത്. ഷാരിസ്, നെബിന്, ഷാല്ബിന് എന്നിവര് ചേര്ന്നാണ് ചിത്രത്തിന്റെ രചന നിര്വഹിച്ചിരിക്കുന്നത്. സിദ്ദിഖ്, കലാഭവന് ഷാജോണ്, സുധീര് കരമന, ജോണി ആന്റണി, ജെയിംസ് എലിയ, ജോര്ഡി പൂഞ്ഞാര്,സേതുലക്ഷ്മി, മഹാനദി ഫെയിം തുളസി തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
2021-06-26