തിരുവനന്തപുരം: ഐടി മേഖലയിൽ അഭിമാന നേട്ടവുമായി മലയാളി ഐടി കമ്പനി എൻകോർ ടെക്നോളജീസ്. യൂറോപ്പിലേക്ക് പ്രവർത്തന മേഖല വിപുലീകരിച്ചിരിക്കുകയാണ് എൻഡോർ ടെക്നോളജീസ് എന്ന ഐടി കമ്പനി. തിരുവനന്തപുരം ടെക്നോപാർക്ക് ആസ്ഥാനമായി 2017 ലാണ് കമ്പനി പ്രവർത്തനം ആരംഭിച്ചത്. ജർമ്മനിയിലും സ്ലോവാക്യയിലുമായി കമ്പനിയുടെ രണ്ടു പുതിയ ഓഫീസുകൾ ആരംഭിച്ചു.
നിരവധി ഉപഭോക്താക്കളുടെ ആവശ്യം പരിഗണിച്ചാണ് കമ്പനി യൂറോപ്പിലേക്ക് പ്രവർത്തനം വിപുലീകരിച്ചത്. പൊതുമരാമത്ത് മന്ത്രി മുഹമ്മദ് റിയാസ് ആണ് യൂറോപ്പിലെ രണ്ട് ഓഫിസുകളുടെയും ഉദ്ഘാടനം നിർവ്വഹിച്ചത്. തിരുവനന്തപുരത്ത് വെച്ച് ഓൺലൈനായാണ് ഉദ്ഘാടന ചടങ്ങ് നടന്നത്. എൻകോർ ടെക്നോളജീസിന്റെ ടെക്നോപാർക്കിലെ പുതിയ ഓഫിസും മന്ത്രി ഉദ്ഘാടനം ചെയ്തു. ടെക്നോപാർക്ക് സിഇഒ സഞ്ജീവ് നായർ ചടങ്ങിൽ പങ്കെടുത്തു.
ആരോഗ്യ മേഖലയിലാണ് എൻകോർ ടെക്നോളജീസ് സാങ്കേതിക സേവനങ്ങൾ നൽകുന്നത്. നിലവിൽ അമേരിക്ക ഉൾപ്പെടെയുള്ള വിവിധ രാജ്യങ്ങളിൽ എൻകോർ ടെക്നോളജീസ് സേവനം ലഭ്യമാക്കുന്നുണ്ട്. കഴിഞ്ഞ ആറ് വർഷം കൊണ്ട് ആരോഗ്യ മേഖലയിലെ ഐടി സൊല്യൂഷനുകളിൽ ഏറ്റവും മികച്ച സേവന ദാതാക്കളായി വളരാൻ എൻകോർ ടെക്നോളജീസിന് കഴിഞ്ഞതായി കമ്പനി സ്ഥാപകരായ രാകേഷ് രാമചന്ദ്രൻ, നൈജിൽ ജോസഫ്, രതീഷ് കുമാർ എന്നിവർ പറഞ്ഞു. ആർട്ടിഫിഷ്യൽ ഇന്റലിജൻസ്, മെഷീൻ ലേണിങ്, ഇമേജ് പ്രോസസ്സിങ് എന്നീ മേഖലകളിലെ വൈദഗ്ധ്യം പ്രയോജനപ്പെടുത്തി കൂടുതൽ വിപണികളിലേക്കും കടക്കാനുള്ള ശ്രമത്തിലാണ് കമ്പനിയെന്നും ഇവർ അറിയിച്ചു.