മഹാരാഷ്ട്രയിലെ തിയേറ്റര് ഉടമകള്ക്ക് മുന്നറിയിപ്പുമായി രാജ് താക്കറെയുടെ സംഘടന മഹാരാഷ്ട്ര നവ നിര്മാണ് സേന. ‘ദി ലെജന്ഡ് ഓഫ് മൗല ജാട്ട്’ എന്ന പാകിസ്ഥാന് സിനിമ ഈ മാസം 30നാണ് റിലീസ് നിശ്ചയിച്ചിരിക്കുന്നത്. ഇതിനെതിരെയാണ് സംസ്ഥാനത്തെ തിയേറ്റര് ഉടമകള്ക്കും കമ്പനികള്ക്കും നവ നിര്മാണ് സേന കത്തയച്ചത്.
സീ സ്റ്റുഡിയോസ്, മൂവീടൈം സിനിമ, ഓഗസ്റ്റ് എന്റര്ടെയിന്മെന്റ്. തിലക് എന്റര്ടെയിന്മെന്റ് എന്നിവര്ക്കും സംഘടന കത്തയച്ചിട്ടുണ്ട്. ഒരു പതിറ്റാണ്ടിനിടെ ഇന്ത്യയില് റിലീസ് ചെയ്യാനൊരുങ്ങുന്ന ആദ്യ പാക് സിനിമയാണ് ഇത്.
‘പാകിസ്താനില് നിര്മിച്ച പാക് താരങ്ങള് അഭിനയിക്കുന്ന ‘ദി ലെജന്ഡ് ഓഫ് മൗല ജാട്ട്’ എന്ന സിനിമ മഹാരാഷ്ട്രയില് റിലീസ് ചെയ്യാനൊരുങ്ങുകയാണെന്ന് ഞങ്ങളറിഞ്ഞു. പാകിസ്താന് നിരന്തരമായി നടത്തുന്ന ഇന്ത്യാ വിരുദ്ധ പ്രവര്ത്തനങ്ങള് ഞങ്ങള് ചൂണ്ടിക്കാണിക്കേണ്ടതില്ല. നമ്മുടെ സൈനികരും പൊലീസ് ഉദ്യോഗസ്ഥരും സാധാരണക്കാരുമൊക്കെ ഭീകരവാദികളാല് കൊല്ലപ്പെട്ടു. അതുകൊണ്ട് തന്നെ സിനിമ റിലീസ് ചെയ്യരുതെന്ന് ആവശ്യപ്പെടുന്നു’- കത്തില് വ്യക്തമാക്കുന്നു.