ഇന്ത്യയുടെ മുന് പ്രധാനമന്ത്രി അടല് ബിഹാരി വാജ്പേയിയുടെ ജന്മവാര്ഷികാഘോഷത്തോടനുബന്ധിച്ച് ബയോപിക് ചിത്രത്തിന്റെ ഫസ്റ്റ് ലുക്ക് പോസ്റ്റര് പുറത്ത് വിട്ടു. ‘മേം അടല് ഹൂം’ എന്നാണ് ചിത്രത്തിന്റെ പേര്. വാജ്പേയി ആയി വേഷമിടുന്ന നടന് പങ്കജ് ത്രിപാഠി ഇന്സ്റ്റഗ്രാമിലൂടെയായിരുന്നു ചിത്രത്തിന്റെ ഫസ്റ്റ് ലുക്ക് പോസ്റ്റര് പങ്കുവച്ചത്.
ഇന്ത്യയുടെ പ്രധാനമന്ത്രിയായി മൂന്ന് തവണ സേവനം അനുഷ്ഠിച്ചിട്ടുള്ള അടല് ബിഹാരി വാജ്പേയിയുടെ ജീവിതമാണ് ചിത്രം പറയുന്നത്. മേം അടല് ഹൂം എന്ന സിനിമയിലൂടെ കവിയും രാഷ്ട്രതന്ത്രജ്ഞനും മനുഷ്യ സ്നേഹിയുമായ വാജ്പേയിയെ കാണാനാകും. 2023 ഡിസംബറോടെ ചിത്രം റിലീസ് ചെയ്യുമെന്നാണ് അണിയറ പ്രവര്ത്തകര് പറയുന്നത്.
‘ദി അണ്ടോള്ഡ് വാജ്പേയി: പൊളിറ്റീഷന് ആന്ഡ് പാരഡോക്സ്’ എന്ന പുസ്തകത്തെ ആധാരമാക്കിയാണ് ചിത്രം ഒരുക്കിയിരിക്കുന്നത്. മലയാളി മാദ്ധ്യമപ്രവര്ത്തകനായ ഉല്ലേഖ് എന്.പി രചിച്ച പുസ്തകമാണ് ‘ദി അണ്ടോള്ഡ് വാജ്പേയി’. രാഷ്ട്രീയ സ്വയംസേവക സംഘത്തിലൂടെ ഭാരതീയ ജനസംഘത്തിലേയ്ക്കും പിന്നീട് ഭാരതീയ ജനതാ പാര്ട്ടിയുടെ അമരക്കാരനായും മാറിയ അടല്ബിഹാരി വാജ്പേയി 1996ലാണ് ആദ്യമായി പ്രധാനമന്ത്രി പദത്തിലെത്തുന്നത്. പിന്നീട് 1998ലും 1999ലും അദ്ദേഹം പ്രധാനമന്ത്രിയായി തിരഞ്ഞെടുക്കപ്പെട്ടിരുന്നു.