ആലപ്പുഴ: കുട്ടനാട് എംഎല്‍എ തോമസ് കെ. തോമസ് ജാതീയമായി അധിക്ഷേപിച്ചെന്ന് പരാതി നല്‍കിയ എന്‍സിപി മഹിളാ വിഭാഗം ജില്ലാ പ്രസിഡന്റ് ആര്‍ ജി ജിഷക്കെതിരെയും പൊലീസ് കേസ്. തോമസ് കെ തോമസിനെയും ഭാര്യയെയും അധിക്ഷേപിച്ചെന്ന പരാതിയിലാണ് ജിഷക്കെതിരെ പൊലീസ് കേസെടുത്തത്.
യോഗത്തിന് മുമ്പേ എംഎല്‍എ തന്നോട് അസഭ്യം പറഞ്ഞെന്നാണ് ജിഷ പറഞ്ഞത്. പാര്‍ട്ടി അംഗമല്ലാത്ത ഷെര്‍ളി തോമസ് വേദിയില്‍ ഇരുന്നത് ചോദ്യം ചെയ്തപ്പോള്‍ അധിക്ഷേപിച്ചുവെന്നും ചുമലില്‍ പിടിച്ച് തള്ളിയെന്നും ജിഷ പോലീസിന് നല്‍കിയ മൊഴിപ്പകര്‍പ്പിലുണ്ട്. നിന്നെ പോലുള്ള ജാതികളെ പാര്‍ട്ടിയില്‍ വേണ്ടെന്ന് പറഞ്ഞുവെന്നും തന്നെ അടിക്കാന്‍ ഓങ്ങിയപ്പോള്‍ മറ്റുള്ളവര്‍ തടയുകയായിരുന്നുവെന്നും ജിഷ വ്യക്തമാക്കി. ജിഷയുടെ പരാതിയില്‍ തോമസ് കെ തോമസിനും ഭാര്യ ഷേര്‍ളി തോമസിനുമെതിരെ പട്ടികജാതി പീഡന നിരോധന നിയമപ്രകാരമാണ് ഹരിപ്പാട് പൊലീസ് കേസെടുത്തത്. ഈ മാസം ഒമ്പതിന് ഹരിപ്പാട് മണ്ഡലത്തിലെ എന്‍സിപി ഫണ്ട് ശേഖരണ യോഗത്തിലാണ് കേസിനാസ്പദമായ സംഭവം നടന്നത്. ജിഷയുടെ നിറം പറഞ്ഞ് ഷേര്‍ലി തോമസ് ആക്ഷേപിക്കുകയും പിന്നാലെ നേതാക്കള്‍ തമ്മില്‍ പരസ്പരം വാക്കേറ്റമുണ്ടാവുകയും ചെയ്തു.
അതേസമയം, ജിഷ നല്‍കിയ പരാതിയില്‍ എംഎല്‍എയെ ഒന്നാം പ്രതിയും ഭാര്യയെ രണ്ടാം പ്രതിയുമാക്കിയാണ് കേസെടുത്തത്.