തരൂര്‍ കളത്തിലിറങ്ങിയില്ലായിരുന്നെങ്കില്‍ ഇത്തവണത്തെ കോണ്‍ഗ്രസ് അധ്യക്ഷ തിരഞ്ഞെടുപ്പിന് ഇത്ര പ്രാധാന്യം കിട്ടുമായിരുന്നോ എന്നത് പ്രധാനപ്പെട്ട ചോദ്യം തന്നെയാണ്. പ്രതിപക്ഷ നിരയില്‍ കോണ്‍ഗ്രസിന്റെ ജോഡോ യാത്രയെ പോലും അവഗണിച്ച ദേശീയ മാധ്യമങ്ങള്‍ തരൂരിന്റെ സ്ഥാനാര്‍ഥിത്വത്തിന് കൂടുതല്‍ കവറേജ് നല്‍കി. തോറ്റ തരൂരിനെയും പേടിക്കുന്ന തരത്തിലാണ് നിലവില്‍ ചില കേരള നേതാക്കളുടെ പ്രതികരണം. തരൂരിന് ഏറ്റവും കൂടുതല്‍ ശത്രുക്കള്‍ പാര്‍ട്ടിയിലുള്ളത് കേരളത്തില്‍ തന്നെയായിരിക്കും. മുല്ലപ്പള്ളിയായാലും ചെന്നിത്തലയായാലും മുരളീധരനായാലും കൊടിക്കുന്നിലായാലും ഗ്രൂപ്പ് ഭേദമെന്യ ശത്രുപക്ഷത്താണ്. എന്നാലും, തരൂര്‍ തിരുവനന്തപുരത്ത് ലാന്‍ഡ് ചെയ്തില്ലായിരുന്നെങ്കില്‍ പണ്ടേ ആ സീറ്റ് ബിജെപിയുടെ അക്കൗണ്ടിലായേനെ എന്നത് ഇവര്‍ ഓര്‍ക്കുന്നത് നല്ലതാണ്.
അതേസമയം, തരൂരിന്റെ കാര്യത്തില്‍ ചിലരെല്ലാം നേരത്തെ നിലപാട്‌ വ്യക്തമാക്കിയിട്ടുണ്ട്. മാത്യു കുഴല്‍നാടനും യുവനിരയിലെ ശബരീനാഥനും തുടക്കം മുതല്‍ തരൂരിന് ഒപ്പമായിരുന്നു. പത്രികയില്‍ പിന്തുണച്ച് ഒപ്പിട്ടവരില്‍ ഉമ്മന്‍ ചാണ്ടിയുടെ വിശ്വസ്തരായ തമ്പാനൂര്‍ രവിയും കെ.സി അബുവും അടക്കം ഉണ്ടായിരുന്നു. ആന്റണിയുടെ ഏറ്റവും വിശ്വസ്തനായ എം.കെ രാഘവനായിരുന്നു ഫലത്തില്‍ തരൂരിന്റെ വലംകൈ. തരൂര്‍ തോറ്റിട്ടും ഹീറോ തന്നെ എന്ന് പറയാന്‍ ഹൈബി ഈഡനും രംഗത്ത് വന്നു. എന്നാല്‍, രമേശ് ചെന്നിത്തല ഗുജറാത്തില്‍ വരെ പോയി ഖാര്‍ഗെക്ക് വോട്ട് പിടിച്ചു.
അതിനിടെ, കേരളത്തിലെ കോണ്‍ഗ്രസിന്റെ സീനിയര്‍ നേതാക്കള്‍ ഒരുതട്ടിലും യുവനേതാക്കള്‍ ഗ്രൂപ്പ് വ്യത്യാസമില്ലാതെ മറ്റൊരു ടീമായും മാറുന്നതായി കാണാനും സാധിക്കും. 300 വോട്ടിനപ്പുറം തരൂര്‍ നേടില്ല എന്ന് ഉറപ്പിച്ച നേതാക്കള്‍ പലരും 1072 കണ്ട് ഞെട്ടി. ചിലര്‍ 8000 വും 1000 ഉം തമ്മിലുള്ള ദൂരം വിവരിച്ച് ആശ്വസിച്ചു. കേരളത്തിലെ പല നേതാക്കളുടെയും പ്രതികരണത്തില്‍ തരൂര്‍ തലപ്പത്ത് എത്തിയാല്‍ വല്ലാതെയങ്ങ് വളര്‍ന്ന് പോകുമോ എന്ന ആശങ്ക അറിയാതെ പുറത്തുവന്നു. ഇനി കോണ്‍ഗ്രസ് ഖാര്‍ഗയുടെ കൈകളിലായതോടെ ഹൈക്കമാന്‍ഡിനും ആശ്വസിക്കാം. ഇതുവരെ പാര്‍ട്ടിയില്‍ പ്രധാന പദവികള്‍ ഒന്നുമില്ലാത്ത തരൂരിനെ ഇനി പദവികള്‍ തേടിവരുമോ എന്ന് നോക്കിക്കാണേണ്ടതാണ്. മേഖലാ അടിസ്ഥാനത്തില്‍ വൈസ് പ്രസിഡന്റുമാരോ വര്‍ക്കിങ് പ്രസിഡന്റുമാരോ വന്നേക്കാം. അതില്‍ തരൂരും ഉള്‍പ്പെടുമോ? അതോ പ്രവര്‍ത്തക സമിതിയില്‍ ഈ തോല്‍വി തരൂരിന് സീറ്റ് ഉറപ്പിച്ചു എന്ന് പറയുന്നത് ശരിയായി വരുമോ? കണ്ടറിയാം…