ഇലോണ്‍ മസ്‌കിന്റെ ഉടമസ്ഥതയിലുള്ള സ്പേസ് എക്‌സ് ഉപവിഭാഗമായ സ്റ്റാര്‍ലിങ്ക് കമ്മ്യൂണിക്കേഷന്‍സിന്റെ സേവനം ഇന്ത്യയില്‍ ആരംഭിക്കുന്നതിനായി ടെലികോം വകുപ്പിന് ലൈസന്‍സ് അപേക്ഷ നല്‍കിയതായി റിപ്പോര്‍ട്ട്. ഗ്ലോബല്‍ മൊബൈല്‍ പേഴ്‌സണല്‍ കമ്മ്യൂണിക്കേഷന്‍ ബൈ സാറ്റലൈറ്റ് (ജിഎംപിസിഎസ്) ലൈസന്‍സിന് വേണ്ടിയാണ് അപേക്ഷ നല്‍കിയിരിക്കുന്നത്.
അതേസമയം, ലൈസന്‍സിന് അപേക്ഷിക്കുന്ന മൂന്നാമത്തെ കമ്പനിയാണ് സ്പേസ് എക്‌സ്. ബഹിരാകാശ വിക്ഷേപണ സേവനങ്ങളുടെ ലോകത്തെ മുന്‍നിര ദാതാക്കളും ബഹിരാകാശ സഞ്ചാരികളെ അന്താരാഷ്ട്ര ബഹിരാകാശ നിലയത്തിലേക്ക് എത്തിക്കുന്ന ആദ്യത്തെ സ്വകാര്യ കമ്പനിയുമാണ് SpaceX. മനുഷ്യനുള്ള എല്ലാ ബഹിരാകാശ ദൗത്യങ്ങളുടെയും ക്രൂവിനെ വിജയകരമായി ഭ്രമണപഥത്തില്‍ എത്തിച്ച ഒരേയൊരു കമ്പനിയാണിത്. ഭാരതി ഗ്രൂപ്പിന്റെ പിന്തുണയുള്ള വണ്‍വെബും, റിലയന്‍സ് ജിയോ ഇന്‍ഫോകോമിന്റെ ഉപഗ്രഹ വിഭാഗവും നേരത്തെ ലൈസന്‍സിന് അപേക്ഷ നല്‍കിയിട്ടുണ്ട്.
എന്നാല്‍, രാജ്യത്ത് സേവനം ആരംഭിക്കണമെങ്കില്‍ ഐഎസ്ആര്‍ഒയുടെ ഉള്‍പ്പടെ ലൈസന്‍സ് ആവശ്യമാണ്. മാത്രമല്ല ഇത്തരം കമ്പനികള്‍ സാറ്റലൈറ്റില്‍ നിന്നും ലോക്കല്‍ ഏരിയ നെറ്റ്വര്‍ക്കിലേക്ക് ഡാറ്റ നല്‍കുന്നതിനായി ഗ്രൗണ്ട് സ്റ്റേഷനുകളും സജ്ജീകരിച്ചിരിക്കണം. രാജ്യത്തെ സ്‌പെയ്‌സ് ഇന്റര്‍നെറ്റ് മേഖലയില്‍ സ്റ്റാര്‍ലിങ്ക്, എയര്‍ടെല്‍, ജിയോ എന്നിവയ്ക്ക് പുറമേ ആമസോണ്‍ പോലുള്ള കമ്പനികളും ലൈസന്‍സ് നേടുന്നതിനുള്ള ശ്രമത്തിലാണ്.