കൊച്ചി: കണ്ണൂര് സര്വകലാശാലയില് നടന്ന ചരിത്ര കോണ്ഗ്രസിനിടെ ഗവര്ണര് ആരിഫ് മുഹമ്മദ് ഖാന് നേരെ ആക്രമണ ശ്രമമുണ്ടായെന്ന ആരോപണത്തില് കേസെടുത്ത് അന്വേഷണം നടത്തണമെന്ന ഹര്ജി തള്ളി ഹൈക്കോടതി.
സംഭവത്തില് ഗവര്ണര്ക്ക് പരാതിയുണ്ടോയെന്ന് ചോദിച്ച കോടതിയോട് അറിയില്ലെന്നായിരുന്നു ഹര്ജിക്കാരനായ അഭിഭാഷകനും ബിജെപി ഇന്റലക്ച്വല് സെല്ലിന്റെ മുന് കണ്വീനറുമായ ടി ജി മോഹന്ദാസ് നല്കിയ മറുപടി. വിഷയത്തില് എന്തെങ്കിലും പരാതിയുണ്ടെങ്കില് സ്വീകരിക്കേണ്ട നിയമനടപടി ഇതല്ലെന്നും കോടതി ചൂണ്ടിക്കാട്ടി. ചീഫ് ജസ്റ്റിസ് എസ്. മണികുമാര് അധ്യക്ഷനായ ബെഞ്ചാണ് തള്ളിയത്.
2019 ഡിസംബര് 28ന് നടന്ന സംഭവത്തില് ഇതുവരെയും എഫ്.ഐ.ആര് രജിസ്റ്റര് ചെയ്തിട്ടില്ല. ഗവര്ണര് പ്രസംഗിക്കുന്നതിനിടെ ചരിത്രകാരനായ പ്രഫസര് ഇര്ഫാന് ഹബീബ് ആക്രമണം നടത്താന് ശ്രമിച്ചെന്നായിരുന്നു ഹര്ജിയിലെ വാദം.