എവിടെയെങ്കിലും ഫ്രീ വൈ-ഫൈ നെറ്റ്വര്ക്ക് ഉണ്ടെന്ന് കേട്ടാല് മൊബൈല് ഡാറ്റ ലാഭിക്കാനായി ചാടി വീഴാത്തവര് ചുരുക്കമായിരിക്കും. ചിലര് പ്രൈവറ്റ് വൈ-ഫൈ നെറ്റ്വര്ക്കുകളില് കയറിക്കൂടാനായി വെറുതേ പാസ്വേഡുകള് അടിച്ച് ഭാഗ്യം പരീക്ഷിക്കാറുമുണ്ട്. അത്തരത്തില് ഫ്രീ വൈ-ഫൈ നെറ്റ്വര്ക്ക് മറ്റുള്ളവര്ക്കായി ഒരുക്കി നല്കിയ ഒരാള് പറ്റിച്ച പണിയാണ് ഇപ്പോള് സോഷ്യല് മീഡിയയില് വൈറലാകുന്നത്.
ടിക്ക് ടോക്കിലും പിന്നീട് ട്വിറ്ററിലും ‘ലോകത്ത് ഇപ്പോഴും നല്ലവരായ മനുഷ്യരുള്ളതിന് ദൈവത്തിന് നന്ദി’ എന്ന അടിക്കുറിപ്പോടെ പോസ്റ്റ് ചെയ്ത വീഡിയോയില് ഫ്രീ വൈ-ഫൈ നെറ്റ്വര്ക്ക് എന്ന് ഒരിടത്ത് പോസ്റ്റര് പതിച്ചിരിക്കുന്നതായി കാണാം. പോസ്റ്ററിന് താഴെയായി തന്നെ നെറ്റ്വര്ക്കില് ജോയിന് ചെയ്യാനുള്ള പാസ്വേഡും കുറച്ച് പേപ്പര് ചുരുളുകളായി ഒട്ടിച്ച് ചേര്ത്തിട്ടുണ്ട്. എന്നാല്, ഈ പാസ്വേഡ്, പോസ്റ്ററില് നിന്ന് ഇളക്കിയെടുക്കുമ്ബോഴാണ് ശരിക്കുമുള്ള അമളി വെളിവാകുന്നത്. മീറ്ററുകള് നീളം വരുന്ന പാസ്വേഡാണ് പോസ്റ്റര് പതിച്ച വിരുതന് തയ്യാറാക്കിയത്. എടുക്കാന് ശ്രമിക്കുന്തോറും ചുരുള് നിവര്ന്ന് നീളം കൂടി വരുന്ന തരത്തില് അത് സമര്ഥമായി തന്നെ പോസ്റ്ററിന് താഴെ ഉള്പ്പെടുത്തുകയായിരുന്നു.