ന്യൂഡൽഹി: കോൺഗ്രസ് സംഘടന തെരഞ്ഞെടുപ്പിൽ അനിശ്ചിതത്വം തുടരുന്നു. പാർട്ടി പ്രസിഡന്റിനെ തെരഞ്ഞെടുക്കുന്നതിനെ കുറിച്ച് കോൺഗ്രസ് നേതൃത്വം ഇതുവരെ പ്രതികരണം നടത്തിയിട്ടില്ല. ഓഗസ്റ്റ് ഇരുപതിന് പിസിസി തെരഞ്ഞെടുപ്പുകൾ പൂർത്തിയാക്കുമെന്നും ഓഗസ്റ്റ് 21ന് നടപടികൾ തുടങ്ങി സെപ്റ്റംബർ 20ന് എഐസിസി അധ്യക്ഷനെ തെരഞ്ഞെടുക്കുമെന്നുമായിരുന്നു കോൺഗ്രസ് നേരത്തെ പ്രഖ്യാപിച്ചത്. എന്നാൽ പിന്നീട് വിഷയത്തിൽ പ്രതികരണം നടത്താൻ കോൺഗ്രസ് തയ്യാറായിട്ടില്ല.
കോൺഗ്രസ് അദ്ധ്യക്ഷ സ്ഥാനത്തേക്കില്ലെന്നാണ് രാഹുൽഗാന്ധിയുടെ നിലപാട്. സോണിയാ ഗാന്ധിക്ക് ഇനി ദീർഘനാൾ കോൺഗ്രസ് അദ്ധ്യക്ഷ സ്ഥാനത്ത് തുടരാനാവില്ല. പ്രിയങ്ക ഗാന്ധിയെ കോൺഗ്രസ് നേതൃത്വത്തിലേക്ക് എത്തിക്കണമെന്നാണ് ചില നേതാക്കളുടെ ആവശ്യം. കുടുംബ പാർട്ടി വിമർശനം ശക്തമാകുന്ന സാഹചര്യത്തിൽ ഗാന്ധി കുടുംബത്തിൽ നിന്ന് പുറത്തൊരാളെ പ്രസിഡന്റായി തെരഞ്ഞെടുക്കാനാണ് സാധ്യത.
സംസ്ഥാനങ്ങളിൽ തെരഞ്ഞെടുപ്പിന് തൊട്ടു മുൻപ് മാത്രം പ്രവർത്തനം തുടങ്ങുന്നതിൽ പാർട്ടിയിൽ വലിയ അതൃപ്തി നിലനിൽക്കുന്നുണ്ട്. ഈ സാഹചര്യത്തിലാണ് സംഘടനാ തെരഞ്ഞെടുപ്പിലെ അനിശ്ചിതത്വവും വിമർശനം ശക്തമാകുന്നത്.