ബംഗളൂരു: മിലിട്ടറി പോലീസിൽ ചേരാൻ വനിതകൾക്ക് അവസരം. അഗ്നിപഥ് റിക്രൂട്ട്‌മെന്റ് റാലിയിലൂടെ മിലിട്ടറി പോലീസിൽ ചേരാൻ വനിതകൾക്ക് അപേക്ഷിക്കാം. നവംബർ ഒന്നുമുതൽ മൂന്നുവരെ ബെംഗളൂരു മനേക് ഷാ പരേഡ് ഗ്രൗണ്ടിൽ നടക്കുന്ന റിക്രൂട്ട്‌മെന്റ് റാലിയിൽ കേരളം, കർണാടക, ലക്ഷദ്വീപ്, മാഹി എന്നിവിടങ്ങളിലെ അവിവാഹിതരായ വനിതകൾക്ക് പങ്കെടുക്കാം. അപേക്ഷകർ കുറഞ്ഞത് 45 ശതമാനം മാർക്കോടെ പത്താംക്ലാസ് വിജയിക്കണം. ഓരോ വിഷയത്തിനും കുറഞ്ഞത് 33 ശതമാനം മാർക്ക് നേടിയിരിക്കണം. അപേക്ഷകർക്ക് കുറഞ്ഞത് 162 സെ.മീ. ഉയരവും ഉയരത്തിനാനുപാതികമായ ഭാരവുമുണ്ടായിരിക്കണം.
2022 ഒക്ടോബർ ഒന്നിന് 17.5-23 വയസ്സാണ് പ്രായപരിധി. അപേക്ഷകർ 1999 ഒക്ടോബർ ഒന്നിനും 2005 ഏപ്രിൽ ഒന്നിനുമിടയിൽ ജനിച്ചവരാകണം. ശാരീരികക്ഷമതാ പരീക്ഷ, വൈദ്യപരിശോധന, എഴുത്തുപരീക്ഷ എന്നിവയുടെ അടിസ്ഥാനത്തിലായിരിക്കും ഉദ്യോഗാർത്ഥികളെ തെരഞ്ഞെടുക്കുന്നത്. ശാരീരികക്ഷമതാ പരീക്ഷയുടെ ഭാഗമായി 1.6 കിലോമീറ്റർ ഓട്ടം (7 മിനിറ്റ് 30 സെക്കൻഡിൽ പൂർത്തിയാക്കണം), ലോങ് ജമ്പ് (10 അടി), ഹൈജമ്പ് (മൂന്നടി) എന്നിവയിൽ യോഗ്യത നേടണം. വൈദ്യപരിശോധനയ്ക്കുശേഷം യോഗ്യരായവർക്ക് എഴുത്തുപരീക്ഷയുണ്ടായിരിക്കും. എൻ.സി.സി. ‘സി’ സർട്ടിഫിക്കറ്റുള്ളവർക്ക് എഴുത്തുപരീക്ഷ ഉണ്ടായിരിക്കില്ല.
താത്പര്യവും യോഗ്യതയുമുള്ള ഉദ്യോഗാർത്ഥികൾ www.joinindianarmy.nic.in എന്ന വെബ്‌സൈറ്റിൽ രജിസ്റ്റർ ചെയ്ത് അപേക്ഷിക്കണം. ഒക്ടോബർ 12 മുതൽ അഡ്മിറ്റ് കാർഡ് ലഭ്യമാകും. സെപ്റ്റംബർ 7 ആണ് അപേക്ഷ സമർപ്പിക്കേണ്ട അവസാന തീയതി.