തിരുവനന്തപുരം: മുന് ഡിജിപി ആര് ശ്രീലേഖ കള്ളക്കഥകള് മെനയാന് വിദഗ്ധയാണെന്ന് വ്യക്തമാക്കി വിവരാവകാശ പ്രവര്ത്തകന് ജോമോന് പുത്തന്പുരയ്ക്കല് രംഗത്ത്. നടിയെ ആക്രമിച്ച കേസില് ദിലീപ് നിരപരാധിയാണെന്ന ശ്രീലേഖയുടെ വെളിപ്പെടുത്തിയതിന് പിന്നാലെയാണ് അദ്ദേഹത്തിന്റെ പ്രതികരണം.
‘എഎസ്പി ആയിരിക്കെ കുഞ്ഞിനെ കൊന്ന അമ്മയെ രക്ഷിക്കാന് ശ്രീലേഖ ശ്രമിച്ചിട്ടുണ്ട്. പ്രശസ്തിക്ക് വേണ്ടി എന്തും പറയുന്ന ആളാണ് ശ്രീലേഖ. സര്വ്വീസില് ഇരിക്കെ ഒരുകേസിലും അന്വേഷിച്ച് ശിക്ഷ വാങ്ങിക്കൊടുത്ത ചരിത്രം ശ്രീലേഖയ്ക്കില്ല. ഇത്തരം തോന്നിവാസങ്ങള് പറയാനാണ് അവര് മെനക്കെടുന്നത്. ചാനലിലും പത്രത്തിലുമെല്ലാം വീരവാദം മുഴക്കും. പ്രശസ്തി ലഭിക്കാന് എന്തും പറയുന്ന ആളാണ് അവര്. ഇല്ലാത്ത കാര്യങ്ങള് പറഞ്ഞ് കള്ളക്കഥകള് മെനയാന് ശ്രീലേഖ വിദഗ്ധയാണെന്ന് ഓരോ ഘട്ടത്തിലും തെളിഞ്ഞുകൊണ്ടിരിക്കുകയാണ്’- ജോമോന് കൂട്ടിച്ചേര്ത്തു.
അതേസമയം, ദിലീപും പള്സര് സുനിയും ഒരുമിച്ചുള്ള ചിത്രം ഫോട്ടോഷോപ്പാണെന്ന ശ്രീലേഖയുടെ വാദം ചിത്രം പകര്ത്തിയ ഫോട്ടോഗ്രാഫര് തള്ളി. ചിത്രം യഥാര്ത്ഥമാണെന്നും യാതൊരു കൃത്രിമത്വവും നടന്നിട്ടില്ലെന്നും ബിദില് വ്യക്തമാക്കി.