മിന്നല് മുരളി എന്ന ചിത്രത്തിലൂടെ മലയാള സിനിമയെ മറ്റൊരു തലത്തിലേക്ക് എത്തിച്ച സംവിധായകനാണ് ബേസില് ജോസഫ്. ടൊവിനോ-ഗുരു സോമസുന്ദരം എന്നിവരെ പ്രധാന കഥാപാത്രങ്ങളാക്കി ബേസിലൊരുക്കിയ ചിത്രം ഇന്ത്യയില് മാത്രമല്ല ലോകശ്രദ്ധയാകര്ഷിച്ചിരുന്നു. ഇപ്പോഴിതാ മിന്നല് മുരളി കണ്ട ശേഷം സംവിധായകന് ബേസിലിനൊപ്പം സിനിമ ചെയ്യണമെന്ന ആഗ്രഹം പ്രകടിപ്പിച്ചിരിക്കുകയാണ് തമിഴ് നടന് ആര് മാധവന്. മിന്നല് മുരളി കണ്ട് താന് അത്ഭുതപ്പെട്ടുവെന്നും വളരെ മനോഹരമായാണ് ബേസില് ചിത്രം അവതരിപ്പിച്ചതെന്നും മാധവന് പറഞ്ഞു.
‘മലയാള സിനിമകള് മിക്കതും മികച്ചതാണ്. എന്നാല്, ഞാന് അവസാനമായി കണ്ട് അത്ഭുതപ്പെട്ടത് മിന്നല് മുരളി എന്ന ചിത്രമാണ്. എത്ര മനോഹരമായാണ് ആ സിനിമ ചിത്രീകരിച്ചിരിക്കുന്നത്. അവഞ്ചേഴ്സ് പോലുള്ള വലിയ സൂപ്പര് ഹീറോ സിനിമ പോലെ തന്നെ തോന്നി മിന്നല് മുരളിയും. അത്ര മനോഹരമായാണ് സംവിധായകന് അത് അവതരിപ്പിച്ചിരിക്കുന്നത്. ബേസില് ജോസഫിനൊപ്പം എത്രയും പെട്ടന്ന് എനിക്ക് ഒരു സിനിമ ചെയ്യണം’, ക്ലബ് എഫ്എമ്മിനോട് സംസാരിക്കവെ മാധവന് പറഞ്ഞു.
നെറ്റ്ഫ്ളിക്സിലാണ് മിന്നല് മുരളി റിലീസ് ചെയ്തത്. ഗോദയ്ക്ക് ശേഷം ബേസിലും ടൊവിനോയും ഒന്നിച്ച ചിത്രമായിരുന്നു മിന്നല് മുരളി. റിലീസ് ചെയ്ത് തുടര്ച്ചയായ മൂന്ന് വാരങ്ങള് നെറ്റ്ഫ്ലിക്സിന്റെ ആഗോള ലിസ്റ്റിലെ ആദ്യ പത്തില് ഇടം നേടിയ ചിത്രം 2021ല് ഏറ്റവുമധികം റേറ്റിംഗ് ലഭിച്ച ആക്ഷന്, അഡ്വഞ്ചര് ചിത്രങ്ങളുടെ ലിസ്റ്റിലും ഇടംപിടിച്ചിരുന്നു.