കൊച്ചി: സംസ്ഥാനത്ത് കെ-റെയില് കമ്പനി ഇന്നലെ നടത്തിയ സംവാദത്തിന് ബദലായി നടത്തുന്ന ജനകീയ സംവാദത്തിലേക്ക് കെ റെയില് എംഡിയെ ജനകീയ പ്രതിരോധ സമിതി ജനറല് സെക്രട്ടറിയും പ്രസിഡന്റും നേരിട്ട് ക്ഷണിച്ചു. കെ-റെയില് ഓഫീസിലെത്തിയാണ് കത്ത് കൈമാറിയത്. സംവാദത്തിന്റെ ഘടന, പാനല് എന്നിവ നല്കണമെന്നും, ഇതിനുശേഷം പങ്കെടുക്കുന്ന കാര്യത്തില് തീരുമാനമെടുക്കുമെന്നും എംഡി അറിയിച്ചു.
അതേസമയം, മുഖ്യമന്ത്രിയെയും മുന് ധനമന്ത്രി തോമസ് ഐസക്കിനെയും പരിപാടിയിലേക്ക് ക്ഷണിച്ചിട്ടുണ്ട്. എന്നാല്, ആയുര്വേദ ചികിത്സയിലായതിനാല് തോമസ് ഐസക് പങ്കെടുക്കാന് ആവില്ലെന്ന് അറിയിച്ചു.
മെയ് നാലിനാണ് സംവാദം. രാഷ്ട്രീയപാര്ട്ടി പ്രതിനിധികള് സംവാദത്തിലുണ്ടാകില്ല. അതത് മേഖലയിലെ വിദഗ്ദര് മാത്രമാണുണ്ടാവുക. ഇന്നലത്തെ സംവാദത്തില് നിന്ന് പിന്മാറിയ അലോക് വര്മ്മ, ഇന്നലെ പങ്കെടുത്ത രഘുചന്ദ്രന് നായര്, കുഞ്ചെറിയ ഐസക് എന്നിവരും പങ്കെടുക്കും. പദ്ധതിയെക്കുറിച്ച് പ്രാഥമിക പഠനം നടത്തിയ സിസ്ട്രയെയും സംവാദത്തിലേക്ക് ക്ഷണിച്ചിട്ടുണ്ട്.