എസ്.എഫ്.ഐ സമരത്തിനിടെ അന്യായതടങ്കലില് വച്ച് ഭീക്ഷണിപ്പെടുത്തി ശാരീരികമായും മാനസികമായും ഉപദ്രവിച്ചുവെന്ന പരാതിയില് എ.എ റഹീം എംപിക്ക് അറസ്റ്റ് വാറണ്ട്. കേരള യൂണിവേഴ്സിറ്റി സ്റ്റുഡന്സ് സര്വീസസ് മേധാവിയും പ്രൊഫസറുമായ വിജയലക്ഷ്മിയുടെ ഹര്ജിയിലാണ് നടപടി.
നേരിട്ട് ഹാജരാകണമെന്ന നിര്ദേശമുണ്ടായിട്ടും ഹാജരാകാത്തതിനെ തുടര്ന്നാണ് റഹീമിനെതിരെ കോടതി അറസ്റ്റ് വാറണ്ട് പുറപ്പെടുവിച്ചത്. കോടതിയില് ഹാജരാകാമെന്ന ഉറപ്പിന്മേല് സ്റ്റേഷനില് നിന്നു ജാമ്യമനുവദിക്കാമെന്ന വ്യവസ്ഥയോടെയാണ് അറസ്റ്റ് വാറണ്ട്.
തിരുവനന്തപുരം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയുടേതാണ് നടപടി. റഹീമുള്പ്പെടെ 12 പേരാണ് കേസിലെ പ്രതികള്. കേസ് പിന്വലിക്കണമെന്നാവശ്യപ്പെട്ട് സര്ക്കാര് നല്കിയ ഹര്ജി വിജയലക്ഷ്മിയുടെ എതിര്പ്പിനെതുടര്ന്ന് കോടതി നേരത്തെ തള്ളിയിരുന്നു.