ആവശ്യമുള്ളതും അല്ലാത്തതുമായ നൂറു കണക്കിന് സന്ദേശങ്ങളാണ് ഓരോ ദിവസവും നമ്മുടെ ജി മെയില് അക്കൗണ്ടില് വന്നു കിടക്കാറ്. അവ സമയോചിതമായി നീക്കം ചെയ്തില്ലെങ്കില് മെയിലുകള് കൊണ്ട് സ്റ്റോറേജ് ഫുള് ആവും. അങ്ങനെ വന്നാല് പിന്നീട് ആരും അയക്കുന്ന പ്രധാന സന്ദേശങ്ങള് നമുക്ക് ലഭിക്കാതെ വരും.
ഒറ്റ ക്ലിക്കില് തന്നെ എല്ലാ സന്ദേശങ്ങളെയും സെലക്ട് ചെയ്യാനുള്ള സൗകര്യവും അവ ഡിലീറ്റ് ചെയ്യാനുള്ള സൗകര്യവും ജി മെയിലിലുണ്ട്. എന്നാല്, അങ്ങനെ ചെയ്യുന്നത് വഴി പ്രധാനപ്പെട്ട മെയിലുകളും നഷ്ടപ്പെട്ടുപോകാന് സാദ്ധ്യതയുണ്ട്. അതിനാല് തന്നെ ഓരോ സന്ദേശവും തുറന്നു നോക്കി പരസ്യങ്ങള് പോലെ വേണ്ടാത്തവ ഡിലീറ്റ് ചെയ്തു കളയുന്നതാണ് പലരും പിന്തുടരുന്ന രീതി. ഇത് വളരെ സമയം പിടിക്കുന്ന കാര്യമാണ്. എന്നാല്, ഒറ്റ ക്ലിക്കില് പ്രധാനപ്പെട്ട മെയിലുകള് നഷ്ടപ്പെടാതെ ആവശ്യമില്ലാത്ത എല്ലാ മെയിലുകള് എങ്ങനെ ഡിലീറ്റ് ചെയ്യാമെന്നാണ് ഇവിടെ പറയുന്നത്.
ജി മെയില് ഓപ്പണ് ചെയ്ത ശേഷം, മുകളിലെ സെര്ച്ച് ബാറിന് വലത്തേ അറ്റത്തായുള്ള ഫില്ട്ടര് ഓപ്ഷനില് ക്ലിക്ക് ചെയ്യുക. അതില് ഉള്ള ഓപ്ഷനുകളില് ആദ്യത്തേതായ ഫ്രം എന്ന ഭാഗത്ത് നിങ്ങള്ക്ക് സ്ഥിരമായി ആവശ്യമില്ലാത്ത നൂറു കണക്കിന് മെയില് അയക്കുന്നവരുടെ മെയില് അഡ്രസ് ടൈപ്പ് ചെയ്യുക. ശേഷം താഴെയുള്ള സെര്ച്ചില് ക്ലിക്ക് ചെയ്യുക. ഇപ്പോള് ആ അഡ്രസില് നിന്ന് നിങ്ങള്ക്ക് വന്ന മെയിലുകളെല്ലാം കാണിക്കും. ഈ വന്ന മെയിലുകളെ മുഴുവനായി സെലക്ട് ചെയ്യാന് ഇടത് വശത്തുള്ള ചെറിയ ചതുരാകൃതിയിലുള്ള ബോക്സില് ക്ലിക്ക് ചെയ്യുക. എല്ലാം സെലക്ട് ആയി കഴിഞ്ഞാല് അവ ഡിലീറ്റ് ചെയ്യാം.