ഒരേ സമയം രണ്ടു ഫുൾ ടൈം ഡിഗ്രി കോഴ്‌സുകൾ പഠിക്കാം; അവസരമൊരുക്കി യുജിസി

ന്യൂഡൽഹി: ഒരേ സമയം രണ്ടു ഫുൾ ടൈം ഡിഗ്രി കോഴ്‌സുകൾ പഠിക്കാനുള്ള അവസരമൊരുക്കാനൊരുങ്ങി യുജിസി. ഓഫ്‌ലൈനായി ഒരേ സമയം രണ്ടു ഫുൾ ടൈം ഡിഗ്രി കോഴ്‌സുകൾ ചെയ്യാൻ വിദ്യാർത്ഥികളെ അനുവദിക്കുമെന്ന് യുജിസി ചെയർമാൻ ജഗദീഷ് കുമാർ അറിയിച്ചു. ഒരേ സർവകലാശാലയിൽ നിന്നോ ഇതര സർവകലാശാലകളിൽ നിന്നോ വിദ്യാർത്ഥികൾക്ക് ഒരേ സമയം രണ്ടു ഫുൾടൈം ബിരുദ കോഴ്‌സുകൾ പഠിക്കാനുള്ള സൗകര്യമാണ് ഏർപ്പെടുത്തുകയെന്ന് അദ്ദേഹം പറഞ്ഞു.

ഇതുസംബന്ധിച്ച മാർഗനിർദ്ദേശം യുജിസി ഉടൻ പുറപ്പെടുവിപ്പിക്കുമെന്നും അദ്ദേഹം പറഞ്ഞു. പുതിയ ദേശീയ വിദ്യാഭ്യാസ നയത്തിന്റെ ഭാഗമായാണ് യുജിസി ഇത്തരമൊരു തീരുമാനം സ്വീകരിച്ചത്. ഒന്നിലധികം വിഷയങ്ങളിൽ ഒരേ സമയം പ്രാവീണ്യം നേടുന്നതിന് വിദ്യാർത്ഥികളെ പ്രാപ്തരാക്കാൻ ലക്ഷ്യമിട്ടാണ് നടപടി.

വിദ്യാഭ്യാസ സ്ഥാപനത്തിൽ നേരിട്ട് പോയി പഠിക്കാൻ സാധിക്കുന്ന ഓഫ്‌ലൈൻ സമ്പ്രദായത്തിൽ ഒരേ സമയം രണ്ടു ബിരുദ കോഴ്‌സുകൾ പഠിക്കാൻ കുട്ടികളെ അനുവദിക്കുന്നതാണ് പുതിയ മാറ്റം. പഠനത്തിനായി ഒരേ സർവകലാശാല തന്നെ വേണമെന്ന് നിർബന്ധമില്ല. ഇതര സർവകലാശാല കോഴ്‌സുകളും ചെയ്യാൻ കഴിയുന്ന വിധമാണ് പുതിയ പദ്ധതി ആവിഷ്‌ക്കരിക്കുന്നതെന്ന് ജഗദീഷ് കുമാർ വിശദീകരിച്ചു. ഓൺലൈൻ രീതിയിലും ഈ സൗകര്യം പ്രയോജനപ്പെടുത്താൻ കഴിയുമെന്നും അദ്ദേഹം കൂട്ടിച്ചേർത്തു.