കൊച്ചി: കേരളാ ബ്ലാസ്റ്റേഴ്സ് ടീമിന്റെ മുഖ്യപരിശീലകന് ഇവാന് വുകോമാനോവിച്ചിന്റെ കരാര് മൂന്ന് വര്ഷത്തേക്ക് കൂടി നീട്ടിയതായി ബ്ലാസ്റ്റേഴ്സ് എഫ്സി അറിയിച്ചു. കേരള ബ്ലാസ്റ്റേഴ്സില് ചേര്ന്നതുമുതല്, ക്ലബ്ബിന്റെ കളിശൈലിയില് പരിവര്ത്തനപരമായ സ്വാധീനമാണ് ഇവാന് ചെലുത്തിയത്. ടീമിനെ മൂന്നാം ഐഎസ്എല് ഫൈനലിലേക്ക് നയിച്ചതിന് പുറമെ, സീസണില് പ്രധാനപ്പെട്ട ക്ലബ്ബ് റെക്കോര്ഡുകളുടെ ഒരു നിര തന്നെ സ്ഥാപിക്കുകയും ചെയ്തു.
‘ഇവാനുമായി മൂന്ന് വര്ഷത്തെ കരാറില് ഏര്പ്പെട്ടതില് എനിക്ക് സന്തോഷമുണ്ട്. ടീമുമായി സുഗമമായി പൊരുത്തപ്പെട്ട അദ്ദേഹം ബ്ലാസ്റ്റേഴ്സ് കുടുംബത്തിന്റെ അവിഭാജ്യ ഘടകമാണ്. ഇത് ക്ലബിന്റെ ഒരു പ്രധാന നീക്കമാണെന്ന് ഞാന് കരുതുന്നു, ഞങ്ങളുടെ ജോലി സ്ഥിരതയോടെ തുടരാനും കൂടുതല് ലക്ഷ്യങ്ങള് നേടാനും ഞങ്ങള്ക്കിപ്പോള് ശക്തമായ അടിത്തറയുണ്ട്. ഈ വിപുലീകരണത്തിലൂടെ എല്ലാ കേരള ബ്ലാസ്റ്റേഴ്സ് ആരാധകരെയും അഭിനന്ദിക്കാന് ഞാന് ആഗ്രഹിക്കുന്നു’-ബ്ലാസ്റ്റേഴ്സിന്റെ സ്പോര്ട്ടിങ് ഡയറക്ടര് കരോലിസ് സ്കിന്കിസ് പറഞ്ഞു.
കഴിഞ്ഞ വര്ഷം ഞങ്ങളുടെ സഹകരണം ആരംഭിച്ചത് മുതല്, ഈ മനോഹരമായ ക്ലബ്ബിന് ചുറ്റും ശരിയായ ഊര്ജവും വികാരവും എനിക്ക് അനുഭവപ്പെട്ടുവെന്ന് കരാര് വിപുലീകരണത്തെക്കുറിച്ച് ഇവാന് വുകോമനോവിച്ച് പറഞ്ഞു. ‘ഈ പദ്ധതിയെ നയിക്കുന്ന ആളുകളും, ആരാധകരും, കേരളവും എന്നെ പെട്ടെന്ന് ആകര്ഷിച്ചു. കൂടുതല് പ്രതിബദ്ധതയോടും അര്പ്പണബോധത്തോടും കൂടി, അതേ ദിശയില് തുടരാനുള്ള മികച്ച അവസരമാണ് ഇന്ന് നമുക്കുള്ളത്. കരാര് വിപുലീകരണത്തില് ഞാന് ഏറെ സന്തുഷ്ടനാണ്. അടുത്ത സീസണുകളില് മികച്ചവരാകാന് നമുക്കെല്ലാവര്ക്കും കൂടുതല് പ്രചോദനം ലഭിക്കുമെന്ന് പ്രതീക്ഷിക്കുന്നു.- ഇവാന് കൂട്ടിച്ചേര്ത്തു.’