ന്യൂഡല്‍ഹി: ഡല്‍ഹിയിലെ ഗതാഗത കുരുക്ക് പരിഹരിക്കാനും റോഡിലെ സുരക്ഷ വര്‍ധിപ്പിക്കാനും ഗതാഗത വകുപ്പിന്റെ പുതിയ നീക്കം. ഡല്‍ഹിയിലെ റോഡുകളില്‍ ബസുകള്‍ക്കും ചരക്ക് വാഹനങ്ങള്‍ക്കും പ്രത്യേക പാത ഏര്‍പ്പെടുത്തി. ഏപ്രില്‍ ഒന്ന് മുതല്‍ ഈ പാതയിലൂടെ മാത്രമേ ബസുകളും ചരക്ക് വാഹനങ്ങളും സഞ്ചരിക്കാന്‍ പാടുള്ളു. ആദ്യഘട്ടത്തില്‍ 15 റോഡുകളില്‍ പ്രത്യേക പാത ഏര്‍പ്പെടുത്താനാണ് തീരുമാനം.
അതേസമയം, നിയമം ലംഘിച്ച് മറ്റു പാതകളിലൂടെ യാത്ര ചെയ്യുന്ന വാഹനങ്ങളുടെ ഡ്രൈവര്‍മാര്‍ക്ക് 10,000 രൂപ പിഴയും ആറ് മാസം വരെ തടവ് ശിക്ഷയും ലഭിക്കും. ട്രാഫിക് പോലീസും ഗതാഗത വകുപ്പും ചേര്‍ന്ന് രാവിലെ എട്ട് മണി മുതല്‍ രാത്രി 10 വരെ ഈ പാതകള്‍ ബസുകള്‍ക്കും ചരക്ക് വാഹനങ്ങള്‍ക്കും മാത്രമായി ഒരുക്കും. ബാക്കി സമയങ്ങളില്‍ മറ്റു വാഹനങ്ങള്‍ക്ക് ഈ പാതയിലൂടെ സഞ്ചരിക്കം. ബസ് പാതകള്‍ മനസിലാവാന്‍ മുന്നറിയിപ്പ് ബോര്‍ഡുകള്‍ സ്ഥാപിക്കാന്‍ പൊതുമരാമത്ത് വകുപ്പിന് നിര്‍ദേശം നല്‍കി.
പ്രത്യേക പാതയിലൂടെയുള്ള ഗതാഗതം നടപ്പാക്കാന്‍ രണ്ട് ഷിഫ്റ്റുകളിലായി രണ്ട് ടീമിനേയും ഗതാഗത വകുപ്പ് നിയോഗിച്ചിട്ടുണ്ട്. അനധികൃതമായി പാതകളില്‍ പാര്‍ക്ക് ചെയ്ത വാഹനങ്ങള്‍ക്ക് പിഴ ചുമത്തുകയും, വാഹനം മാറ്റാന്‍ ഉടമ തയ്യാറായില്ലെങ്കില്‍ ക്രെയിന്‍ ഉപയോഗിച്ച് വാഹനം അവിടെനിന്നും മാറ്റുകയും ചെയ്യും. ഇതിനുള്ള ചാര്‍ജ് ഉടമയില്‍ നിന്ന് ഈടാക്കും. ഇത്തരം വാഹനങ്ങളുടെ ഫോട്ടോയും വീഡിയോയും ഉദ്യോഗസ്ഥര്‍ ചിത്രീകരിക്കും.