സാമൂഹ്യ മാദ്ധ്യമങ്ങളിൽ വൈറലാകുകയാണ് നടൻ മേള രഘുവിന്റെ മകൾ ശിൽപ ശശിധർ പങ്കുവെച്ച വീഡിയോ. ശിൽപ്പയുടെ വിവാഹം ഉറപ്പിച്ചതിന് പിന്നാലെയാണ് മേള രഘു അന്തരിച്ചത്. രഘുവിന്റെ മരണശേഷം ആറ് മാസം കഴിഞ്ഞ് സെപ്റ്റംബർ 12 നായിരുന്നു ശിൽപ്പയുടെ വിവാഹം നടന്നത്. വിവാഹഫോട്ടോയിൽ അച്ഛൻ കൂടെ ഇല്ലാത്തതിന്റെ സങ്കടത്തിലായിരുന്നു ശിൽപ്പയും അമ്മയും. എന്നാൽ ഇപ്പോൾ അമ്മയുടെ പിറന്നാൾ ദിനത്തിൽ അച്ഛനെ കൂടി ചേർത്തുനിർത്തിയുള്ള തന്റെ വിവാഹഫോട്ടോ സമ്മാനമായി നൽകിയിരിക്കുകയാണ് ശിൽപ്പ.
എല്ലാ ചിത്രങ്ങൾക്കും ഒരു കഥ പറയാനുണ്ട്’ എന്ന് കുറിച്ചുകൊണ്ടാണ് ശിൽപ വിഡിയോ പങ്കുവച്ചിരിക്കുന്നത്. ഫോട്ടോഫ്രെയിം തുറക്കുന്നതും അത് കണ്ട് ശിൽപയുടെ അമ്മ ശ്യാമള ചിരിക്കുന്നതുമെല്ലാം വീഡിയോയിൽ പകർത്തിയിട്ടുണ്ട്. ഇതുമായി ബന്ധപ്പെട്ട് വയനാട് സുൽത്താൻ ബത്തേരി സ്വദേശിയായ അജില ജാനീഷ് പങ്കുവെച്ച കുറിപ്പും സാമൂഹ്യ മാദ്ധ്യമങ്ങളിൽ ചർച്ചയായി കഴിഞ്ഞു.
അജില ജാനിഷിന്റെ കുറിപ്പ്:
‘രഘു ചേട്ടന്റെ മകൾ ശിൽപ ആയിരുന്നു എന്നെ സമീപിച്ചത്.. ആർക്കും പെട്ടന്ന് മറക്കാൻ കഴിയാത്ത ഒരു മുഖം തന്നെയാണ് അദ്ദേഹത്തിന്റേത്. 1980 ലെ ‘മേള’ എന്ന സിനിമയിലെ നായകനായിരുന്നു രഘു ചേട്ടൻ. അന്ന് ആ സിനിമയിൽ മമ്മുക്ക സഹനടൻ ആയിരുന്നു. ഒരിക്കൽ സർക്കസ് കാണാൻ എത്തിയ നടൻ ശ്രീനിവാസൻ അദ്ദേഹത്തെ കാണുകയും, സിനിമയിലേക്ക് വിളിക്കുകയുമായിരുന്നു. പിന്നീട് മേള എന്ന സിനിമയിലൂടെ അദ്ദേഹം അഭിനയിക്കുകയല്ല ജീവിക്കുകയായിരുന്നു. പിന്നീട് 31 സിനിമകളിൽ അദ്ദേഹം അഭിനയിച്ചു. അവസാനമായി അദ്ദേഹം ലാലേട്ടനൊപ്പം ദൃശ്യം 2 എന്ന സിനിമയിൽ ഹോട്ടൽ ജീവനക്കാരനായി നല്ലൊരു വേഷം ചെയ്തു ശ്രദ്ധ നേടിയിരുന്നു.
ഈ ഫോട്ടോ ഫ്രെയിം ചെയ്യുന്നതിനായി അദ്ദേഹത്തിന്റെ മകൾ എനിക്ക് എഴുതിയ വാക്കുകൾ ഇങ്ങനെ ആയിരുന്നു. ‘ഇത് എൻറെ അച്ഛൻറെ ഫോട്ടോ ആണ്. പേര് മേള രഘു (ശശിധരൻ). കഴിഞ്ഞ മെയ് 3 ന് ആണ് അച്ഛൻ മരണം അടയുന്നത്. അച്ഛൻറെ ഏറ്റവും വലിയ ആഗ്രഹം ആയിരുന്നു എൻറെ വിവാഹം. പക്ഷേ അതിനു കാത്ത് നിൽക്കാതെ അച്ഛൻ പോയി. ഏപ്രിൽ 25 ന് ആയിരുന്നു കല്യാണം നിശ്ചയിച്ചിരുന്നത്. പക്ഷേ ഏപ്രിൽ 16ന് അച്ഛൻ ഹൈപ്പോഗ്ലൈസീമിയ ആയി അഡ്മിറ്റ് ആയി. മരിക്കുന്ന സമയം വരെ ആൾ കോമയിൽ ആയിരുന്നു. ഒന്ന് മിണ്ടാൻ പോലും കഴിഞ്ഞില്ല. അച്ഛൻ തിരിച്ചു വരും എന്ന പ്രതീക്ഷയിൽ കല്യാണം വരെ മാറ്റി വച്ചു. പക്ഷേ അച്ഛൻ തിരികെ വന്നില്ല.
അച്ഛന്റെ മരണശേഷം ആറ് മാസം കഴിഞ്ഞ് സെപ്റ്റബർ 12 നായിരുന്നു വിവാഹം. അച്ഛന് അന്ന് ഇടാൻ വാങ്ങിച്ച മുണ്ടിന്റെയും ഷർട്ടിന്റെയും പടം കൂടി അയച്ചു തരാം, അത് ഇട്ട് കാണാൻ പറ്റിയില്ല, അതാണ്. ഒരുപക്ഷേ അച്ഛൻ ഇല്ലാത്തതുകൊണ്ടാവാം ഫോട്ടോയിൽ അമ്മ ചിരിക്കാത്തത്. ഈ ഫോട്ടോയിൽ അച്ഛനെ ചേർത്തതു കണ്ടാൽ അമ്മയുടെ മുഖത്ത് പഴയ ആ ഒരു ചിരി കാണാൻ കഴിയും. അമ്മയുടെ പിറന്നാൾ വരുന്നത് മാർച്ച് 2 ന് ആണ് ആ സമയത്ത് എനിക്ക് കൊടുക്കാൻ പറ്റിയ ഏറ്റവും വിലമതിക്കുന്ന സമ്മാനം ആകും ഇത്.’