മികച്ച പ്രേക്ഷക പ്രതികരണം നേടി മുന്നേറുകയാണ് മമ്മൂട്ടി ചിത്രം ഭീഷ്മ പർവം. ബിഗ് ബി പുറത്തിറങ്ങി 15 വർഷങ്ങൾക്കു ശേഷം മമ്മൂട്ടിയെ നായകനാക്കി അമൽ നീരദ് സംവിധാനം ചെയ്യുന്ന ചിത്രമാണ് ഭീഷ്മ പർവം. ആനന്ദ് സി. ചന്ദ്രനാണ് ചിത്രത്തിന്റെ ഛായാഗ്രഹണം നിർവ്വഹിച്ചിട്ടുള്ളത്. സുഷിൻ ശ്യാമാണ് സംഗീതം. അമൽ നീരദും ദേവദത്ത് ഷാജിയും ചേർന്നാണ് ചിത്രത്തിന്റെ രചന നിർവഹിച്ചത്.
നാദിയ മൊയ്തു, സൗബിൻ ഷാഹിർ, ഷൈൻ ടോം ചാക്കോ, ശ്രീനാഥ് ഭാസി, ഫർഹാൻ ഫാസിൽ, ദിലീഷ് പോത്തൻ, ജിനു ജോസഫ്, ലെന, ശ്രിന്ദ, വീണ നന്ദകുമാർ, അനസൂയ ഭരദ്വാജ്, അനഘ, അബു സലിം, സുദേവ് നായർ, മാല പാർവതി, കോട്ടയം രമേശ്, പോളി വൽസൻ തുടങ്ങി വലിയ താരനിയും ചിത്രത്തിലുണ്ട്.
ബന്ധുക്കളാലും അടുത്തതലമുറകളാലും ശരശയ്യയിലായ ഭീഷ്മരെപ്പോലെയാണ് ഭീഷ്മ പർവത്തിലെ മമ്മൂട്ടിയുടെ മൈക്കിൾ എന്ന കഥാപാത്രത്തിന്റെ ജീവിതം കടന്നു പോകുന്നത്. എൺപതുകളുടെ അവസാനം നടക്കുന്ന കുടുംബപ്പോരിന്റെ കഥ ആ പഴയ കൊച്ചിയുടെ കാൻവാസിൽ പ്രേക്ഷക ഹൃദയങ്ങളിലേക്ക് പകർന്നു നൽകാൻ അമൽ നീരദിന് കഴിഞ്ഞിട്ടുണ്ട്. 13 എഡിയും സീഗൾസും ഒരുവശത്തും മറ്റൊരു വശത്ത് ലഹരിയും മദ്യവും മദിരാക്ഷിയും പ്രതിഫലിപ്പിക്കുന്ന കൊച്ചിയാണ് ചിത്രത്തിലുള്ളത്.