ട്രാന്സ്ജെന്ഡര് അനന്യ കുമാരി അലക്സിന്റെ മരണത്തില് അന്വേഷണത്തിന് ആരോഗ്യ വകുപ്പ് അഡീഷണല് ഡയറക്ടറെ ചുമതലപ്പെടുത്തി സര്ക്കാര്. ഒരു മാസത്തിനകം റിപ്പോര്ട്ട് നല്കണമെന്നാണ് സര്ക്കാര് ഉത്തരവ്. ലിംഗമാറ്റ ശസ്ത്രക്രിയയിലെ പിഴവാണ് അനന്യയെ ആത്മഹത്യയിലേക്ക് നയിച്ചതെന്ന പരാതിയെ തുടര്ന്ന് സര്ക്കാര് അന്വേഷണത്തിന് ഉത്തരവിടുകയായിരുന്നു.
ലിംഗമാറ്റ ശസ്ത്രക്രിയയില് ഡോക്ടര്ക്ക് പിഴവ് സംഭവിച്ചു എന്ന ആരോപണവുമായി രംഗത്തെത്തിയതിന് പിന്നാലെ അനന്യ ആത്മഹത്യ ചെയ്യുകയായിരുന്നു. 2020 ലാണ് അനന്യ ലിംഗമാറ്റ ശസ്ത്രക്രിയ ചെയ്തത്. എന്നാല്, ശസ്ത്രക്രിയ കഴിഞ്ഞ് ഒരു വര്ഷം കഴിഞ്ഞിട്ടും തനിക്ക് ജോലി ചെയ്യാനാവുന്നില്ലെന്നായിരുന്നു യുവതിയുടെ പരാതി. നിശ്ചിത സമയത്തില് കൂടുതല് എഴുന്നേറ്റു നില്ക്കാന് തനിക്ക് കഴിയുന്നില്ലെന്നും ശാരീരിക പ്രശ്നങ്ങള് ഏറെയുണ്ടെന്നും അവര് പറഞ്ഞിരുന്നു. ആരോഗ്യ പ്രശ്നങ്ങള് കാരണം ജോലിക്ക് പോകാന് പോലും സാധിച്ചിരുന്നില്ല. പല്ല് തേക്കാനോ, നാക്ക് വടിക്കാനോ പോലും പറ്റിയിരുന്നില്ല. മൂത്രമൊഴിക്കണമെങ്കില് വയറ് അമര്ത്തി പിടിക്കണമായിരുന്നു. സാധാരണഗതിയില് ലിംഗമാറ്റ ശസ്ത്രക്രിയ ചെയ്യുന്ന ഒരു വ്യക്തിക്ക് 41 ദിവസത്തെ വിശ്രമകാലം പോലും അസഹനീയമാണ്. മുറിവും, രക്തവും, അസ്ഥിസ്രവവും എല്ലാം കാരണം അനന്യയ്ക്ക് ഇരട്ടി ബുദ്ധിമുട്ടായിരുന്നുവെന്ന് അനന്യയുടെ സഹോദരി വെളിപ്പെടുത്തിയിരുന്നു.
കൊച്ചിയിലെ റിനൈ മെഡിസിറ്റി ഹോസ്പിറ്റലിലെ ഡോ.അര്ജുന് അശോകാണ് ശസ്ത്രക്രിയ നടത്തിയതെന്ന് അനന്യയുടെ സഹോദരി ട്വന്റിഫോറിനോട് പറഞ്ഞിരുന്നു. കേരളത്തിലെ ആദ്യത്തെ ട്രാന്സ്ജെന്ഡര് റേഡിയോ ജോക്കിയായ അനന്യ കഴിഞ്ഞ നിയമസഭാ തെരഞ്ഞെടുപ്പില് ഡെമോക്രാറ്റിക് സോഷ്യല് ജസ്റ്റിസ് പാര്ട്ടിക്ക് വേണ്ടി മലപ്പുറത്തെ വേങ്ങരയില് നിന്ന് മത്സരിക്കാനൊരുങ്ങിയെങ്കിലും പിന്നീട് പിന്മാറുകയായിരുന്നു.