മലപ്പുറം: നടൻ മമ്മൂട്ടിയുടെ ആയുരാരോഗ്യ സൗഖ്യത്തിനായി മൃത്യുഞ്ജയ ഹോമം നടത്തി. മലപ്പുറം തൃപ്രങ്ങോട് ശിവക്ഷേത്രത്തിലായിരുന്നു വഴിപാട് നടന്നത്. മമ്മൂട്ടിയുടെ ജന്മനക്ഷത്രമായ വിശാഖം നാളിലാണ് വഴിപാട് നടത്തിയത്.
ക്ഷേത്രം മുഖ്യതന്ത്രി ബ്രഹ്മശ്രീ കൽപ്പുഴ കൃഷ്ണൻ നമ്പൂതിരിപ്പാടിന്റെ കാർമികത്വത്തിൽ ഏഴോളം തന്ത്രിമാരാണ് ചടങ്ങിൽ പങ്കെടുത്തത്. മമ്മൂട്ടിക്കായി അദ്ദേഹത്തിന്റെ പി.എയും നടൻ ദേവനും നിരവധി ഭക്തരുമാണ് വഴിപാടുകൾ ബുക്ക് ചെയ്തത്. ആയുരാരോഗ്യ സൗഖ്യത്തിനും ദീർഘായുസ്സ് ലഭിക്കാനും സകലദോഷ പരിഹാരങ്ങൾക്കുമായാണ് മൃത്യുഞ്ജയനായ തൃപ്രങ്ങോട്ടപ്പന് മഹാ മൃത്യുഞ്ജയഹോമം നടത്തുന്നത്. വർഷത്തിലൊരിക്കലാണ് ഇവിടെ മഹാമൃത്യുഞ്ജയ ഹോമം നടത്തുന്നത്.