ഇന്ത്യന്‍ ക്രിക്കറ്റ് താരം ജൂലന്‍ ഗോസ്വാമിയുടെ ജീവിതം സിനിമയാക്കാനൊരുങ്ങി പ്രോസിത് റോയ്. അനുഷ്‌ക ശര്‍മയാണ് ചിത്രത്തില്‍ ജൂലന്‍ ഗോസ്വാമിയായി വേഷമിടുന്നത്. ‘ഛക്‌ദേ എക്‌സ്പ്രസ്’ എന്ന സിനിമയുടെ ഷൂട്ടിംഗ് ഉടന്‍ ആരംഭിക്കുമെന്ന് അനുഷ്‌ക തന്നെയാണ് വീഡിയോ വഴി പങ്കുവെച്ചിരിക്കുന്നത്.
സിനിമയിലെ മറ്റ് കഥാപാത്രങ്ങള്‍ ആരൊക്കെയായിരിക്കും എന്ന കാര്യം പുറത്തുവിട്ടിട്ടില്ല. അഭിഷേക് ബാനര്‍ജിയുടെ തിരക്കഥയില്‍ കര്‍ണേഷ് ശര്‍മയാണ് ചിത്രം നിര്‍മിക്കുന്നത്. ‘രബ് നെ ബന ദി ജോഡി’യിലൂടെ വെള്ളിത്തിരയില്‍ നായികയായ അനുഷ്‌ക ശര്‍മ മകള്‍ ജനിച്ച ശേഷം നടിയെന്ന നിലയില്‍ വെള്ളിത്തിരയില്‍ അത്ര സജീവമായിരുന്നില്ല. ഒരിടവേളക്ക് ശേഷമാണ് അനുഷ്‌ക തിരിച്ചെത്തുന്നത്.