കാസർകോട്: കാസർകോട് സിപിഎമ്മിന്റെ പുതിയ ജില്ലാ കമ്മിറ്റി ഓഫീസ് കെട്ടിടം എ കെ ജി മന്ദിരം ഉദ്ഘാടനം ചെയ്തു. മുഖ്യമന്ത്രിയും പൊളിറ്റ്ബ്യൂറോ അംഗവുമായ പിണറായി വിജയനാണ് ഉദ്ഘാടനം നിർവ്വഹിച്ചത്. വിദ്യാനഗർ ചാല റോഡിലാണ് എ കെജി സെന്റർ നിർമ്മിച്ചിരിക്കുന്നത്. 42 സെന്റ് സ്ഥലത്ത് 32,000 ചതുരശ്രയടി വിസ്തൃതിയിൽ ആധുനിക സംവിധാനങ്ങളോടെയാണ് ഓഫീസ് സജ്ജമാക്കിയിട്ടുള്ളത്.
ഉദ്ഘാടന ചടങ്ങിൽ സംസ്ഥാന സെക്രട്ടറി കോടിയേരി ബാലകൃഷ്ണൻ അദ്ധ്യക്ഷത വഹിച്ചു. പിണറായി വിജയൻ പതാക ഉയർത്തുകയും ചെയ്തു. അതേസമയം കേന്ദ്ര കമ്മിറ്റിയംഗം പി കരുണാകരൻ സി കൃഷ്ണൻ നായർ സ്മാരക ഹാളിന്റെ ഉദ്ഘാടനം നിർവ്വഹിച്ചു. കേന്ദ്ര കമ്മിറ്റിയംഗങ്ങളായ എ വിജയരാഘവൻ ചരിത്രശിൽപ്പവും ഇ പി ജയരാജൻ സാമൂഹ്യ ചിത്രശിൽപ്പവും അനാഛാദനം ചെയ്തു.
ചടങ്ങിൽ ജില്ലാ സെക്രട്ടറി എം വി ബാലകൃഷ്ണൻ സ്വാഗതം പറഞ്ഞു. സംസ്ഥാന കമ്മിറ്റിയംഗങ്ങളായ എം വി ജയരാജൻ, പി ജയരാജൻ, ടി വി രാജേഷ്, സി എച്ച് കുഞ്ഞമ്പു എംഎൽഎ, എ കെ ജിയുടെ മകൾ ലൈല കരുണാകരൻ തുടങ്ങിയവരും ചടങ്ങിൽ പങ്കെടുത്തു. കേന്ദ്ര കമ്മിറ്റിയംഗങ്ങളായ പി കെ ശ്രീമതി ഗ്രന്ഥാലയം ഉദ്ഘാടനം ചെയ്തു. കെ കെ ശൈലജ ഫോട്ടോ അനാഛാദനവും എം വി ഗോവിന്ദൻ മീഡിയ റൂം ഉദ്ഘാടനവും നിർവഹിച്ചു.