ന്യൂഡൽഹി: ഡൽഹിയിൽ രാത്രികാല കർഫ്യു പ്രഖ്യാപിച്ചു. ഒമിക്രോൺ വ്യാപനം തുടരുന്നതിന്റെ പശ്ചാത്തലത്തിലാണ് തീരുമാനം. തിങ്കളാഴ്ച്ച മുതൽ രാത്രികാല കർഫ്യു നിലവിൽ വരും. രാത്രി 11 മണി മുതൽ പുലർച്ചെ അഞ്ച് മണി വരെയാണ് കർഫ്യൂ. ഹരിയാന, ഉത്തർപ്രദേശ് എന്നീ സംസ്ഥാനങ്ങളിലും രാത്രികാല കർഫ്യു ഏർപ്പെടുത്തിയിട്ടുണ്ട്.
വരും ദിവസങ്ങളിൽ പുതുവത്സര ആഘോഷങ്ങൾ ഉൾപ്പെടെ നടക്കാനിരിക്കെയാണ് ഡൽഹി സർക്കാർ കർഫ്യൂ പ്രഖ്യാപിച്ചിരിക്കുന്നത്. ക്രിസ്മസിനും ന്യൂ ഇയറിനും ആളുകൾ കൂട്ടം കൂടുന്നത് ഡൽഹി നിരോധിച്ചിരുന്നു. എല്ലാ ആഘോഷ പരിപാടികളും ഒഴിവാക്കണമെന്ന് ഡൽഹി ഡിസാസ്റ്റർ മാനേജ്മെന്റ് അതോറിറ്റി അറിയിക്കുകയും ചെയ്തിരുന്നു.
ഇന്ത്യയിൽ ഇതുവരെ 422 പേർക്കാണ് ഒമിക്രോൺ സ്ഥിരീകരിച്ചത്. മഹാരാഷ്ട്രയിലാണ് നിലവിൽ ഏറ്റവും അധികം രോഗികളുള്ളത്. കോവിഡ് വ്യാപനത്തിന്റെ പശ്ചാത്തലത്തിൽ പുതുവത്സര ആഘോഷങ്ങൾക്ക് പല സംസ്ഥാനങ്ങളും കർശന നിയന്ത്രണം ഏർപ്പെടുത്തിയിട്ടുണ്ട്. പൊതുജനങ്ങൾ ജാഗ്രത പാലിക്കണമെന്നും കോവിഡ് പ്രോട്ടോകോളുകൾ പാലിക്കണമെന്നും ആരോഗ്യ മന്ത്രാലയം നിർദ്ദേശിച്ചു.