കൊച്ചി: താരസംഘടനയായ അമ്മയുടെ ഭാരവാഹി തെരഞ്ഞെടുപ്പിൽ ഔദ്യോഗിക പാനലിനെ മറികടന്ന് സ്വന്തം നിലയിൽ മണിയൻ പിള്ള രാജു വിജയിച്ചത് മോഹൻലാലിന് ഉൾപ്പെടെ വലിയ തിരിച്ചടിയായിരിക്കുകയാണ്. വൈസ് പ്രസിഡന്റ് സ്ഥാനത്തേക്കാണ് മണിയൻപിള്ള രാജു മത്സരിച്ചത്. ശ്വേതാ മേനോനും ആശാ ശരത്തിനും എതിരെയായിരുന്നു മണിയൻപിള്ള രാജു മത്സരിച്ചത്. മത്സരത്തിലെ മാന്യത അവസാന വട്ടം വരെ നിലനിർത്തിയായിരുന്നു മണിയൻപിള്ള രാജുവിന്റെ മത്സരം. വ്യക്തിപരമായ ആക്ഷേപങ്ങൾ നേരിട്ടപ്പോൾ മറുപടി പറയാൻ പോലും അദ്ദേഹം തയ്യാറായിരുന്നില്ല. ആരേയും വ്യക്തിപരമായി അദ്ദേഹം ആക്ഷേപിച്ചിട്ടുമില്ല.
അമ്മയുടെ രൂപീകരണത്തിൽ എളിയ പങ്കു വഹിക്കാൻ കഴിഞ്ഞ ഒരു കലാകാരനാണ് താനെന്നും അമ്മ സംഘടിപ്പിച്ച ഒരു പരിപാടിയിൽ നിന്നും ഇതുവരെ ഞാൻ മാറി നിന്നിട്ടില്ലെന്നുമായിരുന്നു മണിയൻപിള്ള രാജു പറഞ്ഞിരുന്നത്. അമ്മയുടെ ചരിത്രത്തിൽ ആദ്യമായാണ് വോട്ടിഗിലൂടെ ഭാരവാഹികളെ തെരഞ്ഞെടുക്കുന്നത്. വൈസ് പ്രസിഡന്റ് എക്സിക്യൂട്ടീവ് കമ്മിറ്റി സ്ഥാനങ്ങളിലേക്കാണ് തെരഞ്ഞെടുപ്പ് നടന്നത്. രണ്ട് വൈസ് പ്രസിഡന്റ് സ്ഥാനത്തേക്ക് മൂന്ന് പേരാണ് മത്സരിച്ചത്. മണിയൻപിള്ള രാജുവിന് എതിരെ ഔദ്യോഗിക പാനലിൽ നിന്നും ആശ ശരത്തും ശ്വേത മേനോനുമാണ് മത്സരിച്ചത്. 11 അംഗ എക്സിക്യൂട്ടീവ് കമ്മിറ്റിയിലേക്ക് ആകെ 14 പേരാണ് മത്സരിച്ചത്.
അതേസമയം എതിർസ്ഥാനാർത്ഥികൾക്കെതിരെ പോസ്റ്റിട്ട സിദ്ദിഖിന്റെ നടപടിയെ മണിയൻപിള്ള രാജു വിമർശിച്ചിരുന്നു. എതിർ സ്ഥാനാർഥികൾക്കെതിരെ സിദ്ദിഖ് പോസ്റ്റിട്ടത് ശരിയായില്ലെന്നാണ് മണിയൻ പിള്ള രാജുവിന്റെ പ്രതികരണം. അമ്മയുടെ ആസ്ഥാന മന്ദിരത്തിന്റെ അടിത്തറ ഇളക്കുമെന്ന് വീരവാദം മുഴക്കിയവരൊന്നും പാനലിലില്ലെന്നായിരുന്നു സിദ്ദിഖിന്റെ പോസ്റ്റിലുണ്ടായിരുന്നത്. എന്നാൽ പോസ്റ്റിലൂടെ എതിർ സ്ഥാനാർത്ഥികളെ വിമർശിച്ചതിൽ ശക്തമായ പ്രതിഷേധമുണ്ടെന്ന് മണിയൻപിള്ള രാജു പറഞ്ഞു.
മമ്മൂട്ടിയും ദിലീപും അടക്കമുള്ളവർ ഔദ്യോഗിക പാനലിന് വേണ്ടി പരോക്ഷ വോട്ടു പിടിത്തം നടത്തിയെങ്കിലും മണിയൻ പിള്ളയുടേയും ലാലിന്റേയും ജനകീയത ‘അമ്മ’യിലെ തെരഞ്ഞെടുപ്പിൽ നിർണായകമായിരുന്നു. മത്സരിച്ച ശേഷം ഫലം വന്നപ്പോൾ മിന്നുന്ന ജയമാണ് മണിയൻപിള്ള രാജു നേടിയത്. ആശാ ശരത്ത് മത്സരത്തിൽ പരാജയപ്പെടുകയായിരുന്നു.
11 അംഗ എക്സിക്യൂട്ടീവ് കമ്മിറ്റിയിലേക്ക് ഔദ്യോഗിക പാനലിൽ നിന്നും ബാബുരാജ്, ലൈന, മഞ്ജുപിള്ള, രചന നാരായണൻകുട്ടി, സുധീർ കരമന, സുരഭി ലക്ഷ്മി, ടിനിടോം, ടോവിനോ തോമസ്, ഉണ്ണി മുകുന്ദൻ, നിവിൻ പോളി, ഹണി റോസ് എന്നിവരാണ് മത്സരിച്ചത്. ഇവർക്കെതിരെ വിജയ് ബാബു,ലാൽ, നാസർ ലത്തീഫ് തുടങ്ങിയ താരങ്ങൾ മത്സര രംഗത്ത് ഉണ്ടായിരുന്നു. ഫലം വന്നപ്പോൾ ഔദ്യോഗിക പാനലിലെ ഒൻപത് പേർ വിജയിച്ചു. എന്നാൽ നിവിൻ പോളിയും ഹണി റോസും പരാജയപ്പെട്ടു. ലാലും വിജയ് ബാബും വിജയിച്ചെങ്കിലും നാസർ ലത്തീഫ് പരാജയപ്പെടുകയായിരുന്നു.