ന്യൂഡൽഹി: മുഖ്യമന്ത്രി പിണറായി വിജയനെതിരെ രൂക്ഷ വിമർശനവുമായി ബിജെപി ദേശീയ അദ്ധ്യക്ഷൻ ജെ പി നദ്ദ. ആലപ്പുഴയിലെ രാഷ്ട്രീയ കൊലപാതകങ്ങളുമായി ബന്ധപ്പെട്ടാണ് ജെപി നദ്ദ മുഖ്യമന്ത്രിക്കെതിരെ വിമർശനം ഉന്നയിച്ചത്. പിണറായിയുടെ ഭരണത്തിൽ കേരളത്തിൽ ക്രമസമാധാനം തകർന്നെന്ന് അദ്ദേഹം പറഞ്ഞു. ക്രൂരത കൊണ്ട് ഭയപ്പെടുത്താനാവില്ലെന്നും നദ്ദയുടെ പ്രതികരിച്ചു.
അതേസമയം ആലപ്പുഴയിലെ കൊലപാതകങ്ങളിൽ കേരളസർക്കാരിനോട് കേന്ദ്രം റിപ്പോർട്ട് തേടിയേക്കുമെന്നാണ് വിവരം. കേരളത്തിൽ ഗുരുതരമായ ക്രമസമാധാന വീഴ്ച്ചയാണ് സംഭവിക്കുന്നതെന്നാണ് കേന്ദ്ര ആഭ്യന്തര മന്ത്രാലയം വിലയിരുത്തുന്നത്. പാലക്കാട് സംഭവത്തിന് ശേഷം ജാഗ്രതാ നിർദ്ദേശമുണ്ടായിട്ടും കൊലപാതകങ്ങൾ ആവർത്തിച്ചുവെന്നാണ് കേന്ദ്രത്തിന്റെ വിമർശനം.
കേരളാ പൊലീസിന് വലിയ വീഴ്ച്ച ഉണ്ടായെന്ന് വ്യാപക വിമർശനങ്ങൾ ഉയർന്നിരുന്നു. തുടർന്നാണ് കേന്ദ്രം ഇക്കാര്യത്തിൽ റിപ്പോർട്ട് തേടാനൊരുങ്ങുന്നത്. വിഷയത്തിൽ പ്രാഥമിക റിപ്പോർട്ട് സമർപ്പിക്കാൻ ഉടൻ ഗവർണർക്ക് നിർദ്ദേശം നൽകുമെന്നാണ് സൂചനകൾ. കൊലപാതകങ്ങളിൽ തീവ്രവാദ സംഘടനകൾക്ക് പങ്കുണ്ടോയെന്നും കേന്ദ്ര സർക്കാർ പരിശോധിക്കും.