തിരുവനന്തപുരം: ശശി തരൂരിനോട് വിശദീകരണം തേടുമെന്ന് കോൺഗ്രസ് സംസ്ഥാന അദ്ധ്യക്ഷൻ കെ സുധാകരൻ. കെ റെയിൽ വിഷയവുമായി ബന്ധപ്പെട്ട് ശശി തരൂർ എം പിയുടെ അഭിപ്രായത്തെക്കുറിച്ചാണ് അദ്ദേഹത്തോട് വിശദീകരണം തേടുന്നത്. കെ-റെയിലിൽ ശശി തരൂർ നടത്തിയ അഭിപ്രായത്തോട് പ്രതികരിക്കുന്നില്ലെന്നും അദ്ദേഹത്തോട് ചോദിക്കാതെ പ്രതികരിക്കുന്നത് ശരിയല്ലെന്നും കെ സുധാകരൻ അഭിപ്രായപ്പെട്ടു.
ശശി തരൂർ പാർട്ടിയെ അംഗീകരിക്കുന്ന ഒരാളാണ്. വിഷയത്തെ കുറിച്ച് പാർട്ടി ചർച്ച ചെയ്യും. ശശി തരൂരിന്റെ ഭാഗത്ത് തെറ്റുണ്ടെങ്കിൽ തിരുത്താൻ ആവശ്യപ്പെടും. കെ റെയിൽ പദ്ധതി അശാസ്ത്രീയമാണെന്നും അദ്ദേഹം കൂട്ടിച്ചേർത്തു.
പെൺകുട്ടികളുടെ വിവാഹപ്രായം ഉയർത്തുന്നത് സംബന്ധിച്ച് കോൺഗ്രസ് ഇതുവരെ ചർച്ച നടത്തിയിട്ടില്ല. വിഷയത്തിൽ മുസ്ലീം ലീഗ് പറഞ്ഞത് അവരുടെ അഭിപ്രായമാണ്. കൂടുതൽ ചർച്ചയ്ക്ക് ശേഷം ഇക്കാര്യത്തിൽ കോൺഗ്രസ് അഭിപ്രായം പറയുമെന്നും അദ്ദേഹം അറിയിച്ചു. കെ റെയിൽ പദ്ധതിക്കെതിരെ യു ഡി എഫ് എം പിമാർ കേന്ദ്രത്തിന് സമർപ്പിച്ച നിവേദനത്തിൽ ശശി തരൂർ ഒപ്പിട്ടിരുന്നില്ല. ഇതിനെതിരെ കോൺഗ്രസ് നേതാക്കൾ വിമർശനവുമായി രംഗത്തെത്തിയിരുന്നു.