കോഴിക്കോട്: സംസ്ഥാനത്തെ സര്ക്കാര് സ്കൂളുകളില് പെണ്കുട്ടികള്ക്കും ആണ്കുട്ടികള്ക്കും ഒരേ തരത്തിലുള്ള യൂണിഫോം രീതി നടപ്പാക്കുന്നതില് സര്ക്കാരിന് സമ്മതമാണെന്നറിയിച്ച് വിദ്യാഭ്യാസ മന്ത്രി വി. ശിവന്കുട്ടി. വിഷയത്തില് അനാവശ്യമായ വിവാദം ഒഴിവാക്കണമെന്നും ലിംഗ വ്യത്യാസമില്ലാത്ത വിദ്യാഭ്യാസത്തെ പ്രോത്സാഹിപ്പിക്കുമെന്നും മന്ത്രി വ്യക്തമാക്കി.
ആണ്കുട്ടികളുടെ വസ്ത്രധാരണ രീതി പെണ്കുട്ടികളില് അടിച്ചേല്പ്പിച്ചിരിക്കുകയാണെന്നാരോപിച്ച് പ്രതിഷേധങ്ങള് നടക്കുന്നുണ്ട്. ഇത് ചൂണ്ടിക്കാട്ടി വിദ്യാഭ്യാസ മന്ത്രിക്കും മുഖ്യമന്ത്രിക്കും എംഎസ്എഫ് അടക്കമുള്ള മുസ്ലീം സംഘടനകള് നിവേദനം നല്കുകയും ചെയ്തു.
കോഴിക്കോട് ജില്ലയിലെ ബാലുശ്ശേരി ഗവണ്മെന്റ് ഗേള്സ് ഹയര്സെക്കന്ററി സ്കൂളില് ജെന്ഡര് ന്യൂട്രല് യൂണിഫോം സംവിധാനം നടപ്പിലായതിനെചൊല്ലിയാണ് വിവാദം ഉയരുന്നത്. വസ്ത്രധാരണരീതി ഏകീകരിക്കുന്നതിനെതിരെ വിവിധ മുസ്ലിം സംഘടനകളുടെ നേതൃത്വത്തിലുള്ള കോ ഓര്ഡിനേഷന് കമ്മിറ്റികളും രംഗത്തെത്തിയിട്ടുണ്ട്. ജെന്ഡര് ന്യൂട്രല് യൂണിഫോം എന്ന ആശയം നടപ്പാക്കുന്ന സംസ്ഥാനത്തെ ആദ്യത്തെ ഹയര്സെക്കന്ററി സ്കൂളാണ് ബാലുശ്ശേരി ജി.ജി.എച്ച്.എസ്.എസ്. രക്ഷിതാക്കളുമായും വിദ്യാര്ത്ഥികളുമായും ആലോചിച്ചെടുത്ത തീരുമാനമാണിതെന്നാണ് സ്കൂള് അധികൃതര് വ്യക്തമാക്കുന്നത്.