തിയേറ്ററുകളില് ആവേശത്തിരയിളക്കിയ ചിത്രങ്ങള് ഒടിടി റിലീസിന് ഒരുങ്ങുന്നു. പിടികിട്ടാപ്പുള്ളി സുകുമാര കുറുപ്പിന്റെ ജീവിതത്തെ ആസ്പദമാക്കി പുറത്തിറങ്ങിയ കുറുപ്പ് കൊവിഡ് രണ്ടാം തരംഗത്തിന് ശേഷം തിയേറ്ററുകളില് പുറത്തിറങ്ങിയ ആദ്യ ബിഗ് ബജറ്റ് ചിത്രമാണ്. ദുല്ഖര് ചിത്രം കുറുപ്പ് നെറ്റ്ഫ്ളിക്സില് റിലീസ് ചെയ്യുന്നതായി അണിയറ പ്രവര്ത്തകര് തന്നെ അറിയിച്ചു. കുറുപ്പിലെ നായിക ശോഭിത ധുലിപാലയാണ് ഇന്സ്റ്റാഗ്രാം പോസ്റ്റിലൂടെ ഇക്കാര്യം അറിയിച്ചത്. ചിത്രം ഡിസംബര് 17ന് പുറത്തിറങ്ങുമെന്നാണ് ലഭിക്കുന്ന വിവരം. ദുല്ഖര് സല്മാന്റെ ഉടമസ്ഥതയിലുള്ള വേഫറെര് ഫിലിംസും എം സ്റ്റാര് എന്റര്ടൈന്മെന്റ്സും ചേര്ന്നാണ് നിര്മിച്ചിരിക്കുന്നത്.
പ്രിയദര്ശന്-മോഹന്ലാല് കൂട്ടുകെട്ടില് ഒരുക്കിയ ബിഗ് ബജറ്റ് ചിത്രം മരക്കാര് അറബിക്കടലിന്റെ സിംഹം ആമസോണ് പ്രൈമിലൂടെ ഡിസംബര് 17ന് പുറത്തിറങ്ങും. പ്രൈം തന്നെയാണ് ഇക്കാര്യം ഔദ്യോഗികമായി അറിയിച്ചത്. ആമസോണ് ഹെല്പ്പ് എന്ന ഫേസ്ബുക്ക് ഹാന്ഡിലൂടെയാണ് ചിത്രത്തിന്റെ ഒ.ടി.ടി റിലീസ് സ്ഥിരീകരിച്ചത്. ഏറെനാളത്തെ കാത്തിരിപ്പുകള്ക്ക് ശേഷം ഡിസംബര് 2നാണ് ചിത്രം തിയേറ്ററുകളിലെത്തിയത്.അഞ്ചു ഭാഷകളിലായാണ് ചിത്രം പുറത്തിറങ്ങിയത്.
സുരേഷ് ഗോപിയെ നായകനാക്കി നിഥിന് രഞ്ജി പണിക്കര് സംവിധാനം ചെയ്ത കാവല് ആണ് ഒ.ടി.ടിയില് വരുന്ന മൂന്നാമത്തെ ചിത്രം. ചിത്രം നെറ്റ്ഫ്ളിക്സില് ഡിസംബര് 23ന് പ്രദര്ശിപ്പിക്കുമെന്നാണ് റിപ്പോര്ട്ടുകള്. നവംബര് 25നായിരുന്നു ചിത്രം തിയേറ്ററുകളില് റിലീസ് ചെയ്തിരുന്നത്. ഗുഡ്വില് എന്റര്ടെയ്ന്മെന്റ്സിന്റെ ബാനറില് ജോബി ജോര്ജാണ് ചിത്രം നിര്മ്മിച്ചത്.