ഈ വര്‍ഷത്തെ ഏറ്റവും ജനപ്രീതി നേടിയ ഇന്ത്യന്‍ സിനിമകളുടെ ലിസ്റ്റ് പുറത്തു വിട്ടിരിക്കുകയാണ് പ്രമുഖ ഓണ്‍ലൈന്‍ ഡേറ്റാ ബേസ് ആയ ഐഎംഡിബി. ആറ് ചിത്രങ്ങളുമായി ബോളിവുഡ് ലിസ്റ്റില്‍ മുന്നിലെത്തിയപ്പോള്‍ നാല് തെന്നിന്ത്യന്‍ ചിത്രങ്ങളും ഐഎംഡിബിയുടെ ആദ്യ പത്തില്‍ ഇടം നേടിയിട്ടുണ്ട്.
പ്രേക്ഷക ശ്രദ്ധ നേടിയ സൂര്യ ചിത്രം ജയ് ഭീം ആണ് ഒന്നാം സ്ഥാനത്തെത്തിയിരിക്കുന്നത്. കൂടാതെ വിജയ് ചിത്രം മാസ്റ്റര്‍, ധനുഷിന്റെ കര്‍ണ്ണന്‍ എന്നീ ചിത്രങ്ങളും ലിസ്റ്റില്‍ ഇടം നേടി. ബോളിവുഡ് ചിത്രം ഷേര്‍ഷാ ആണ് രണ്ടാമത്. സൂര്യവന്‍ശി, സര്‍ദാര്‍ ഉദ്ധം, മിമി, ഷിദ്ദത്ത്, ഹസീന്‍ ദില്‍റുബ എന്നീ സിനിമകളാണ് മറ്റ് ബോളിവുഡ് എന്‍ട്രികള്‍. മോഹന്‍ലാലിനെ നായകനാക്കി ജീത്തു ജോസഫ് ചിത്രമായ ദൃശ്യം 2 ആണ് ലിസ്റ്റില്‍ ഇടം നേടിയ മലയാളം സിനിമ. ലിസ്റ്റില്‍ ഒന്‍പതാം സ്ഥാനമാണ് ദൃശ്യം 2വിനുള്ളത്.
നേരത്തെ ഗൂഗിളില്‍ ഈ വര്‍ഷം ഏറ്റവുമധികം തിരയപ്പെട്ട ചിത്രങ്ങളുടെ ലിസ്റ്റിലും ദൃശ്യം 2 ഇടംപിടിച്ചിരുന്നു. ദൃശ്യം 2നൊപ്പം ജയ് ഭീം, ഷേര്‍ഷാ, മാസ്റ്റര്‍, സൂര്യവന്‍ശി എന്നീ ചിത്രങ്ങളും ഗൂഗിളിന്റെ മോസ്റ്റ് സെര്‍ച്ച്ഡ് ലിസ്റ്റില്‍ ഇടം നേടിയിരുന്നു.
ജനപ്രിയ ചിത്രങ്ങളുടെ ലിസ്റ്റ്
1 ജയ് ഭീം
2 ഷേര്‍ഷാ
3 സൂര്യവന്‍ശി
4 മാസ്റ്റര്‍
5 സര്‍ദാര്‍ ഉദ്ധം
6 മിമി
7 കര്‍ണ്ണന്‍
8 ഷിദ്ദത്ത്
9 ദൃശ്യം 2
10 ഹസീന്‍ ദില്‍റുബ