2019 ന്റെ ആദ്യം മുതല് ചന്ദ്രന്റെ അജ്ഞാത വശത്ത് പര്യവേഷണം നടത്തുകയാണ് യുടു2. ചതുരാകൃതിയില് അത്യന്തം ദുരൂഹമായ ഒരു വസ്തു ചൈനീസ് റോവറായ യുടു-2 കണ്ടെത്തിയിരിക്കുകയാണിപ്പോള്. എന്നാല്, ഇതെന്താണെന്ന് നിര്ണയിക്കാനും സ്ഥിരീകരിക്കാനും ശാസ്ത്രലോകത്തിനായിട്ടില്ല. ദുരൂഹ വീട് എന്ന് അര്ഥമുള്ള മിസ്റ്ററി ഹൗസ് എന്നാണ് വസ്തുവിന് ശാസ്ത്രജ്ഞര് നല്കിയിരിക്കുന്ന പേര്.
ദൂരത്ത് നിന്നാണു റോവര് വസ്തുവിന്റെ ചിത്രം എടുത്തിരിക്കുന്നത്. റോവറിനെ വസ്തുവരികിലേക്ക് കൂടുതല് അടുപ്പത്തില് എത്തിച്ച് ദുരൂഹവീടിനെ സൂക്ഷ്മമായി നിരീക്ഷിക്കാന് ചൈനീസ് ബഹിരാകാശ ശാസ്ത്രജ്ഞര്ക്കു പദ്ധതിയുണ്ട്. എന്നാല്, ഈ വിചിത്ര വസ്തുവിനെക്കുറിച്ച് ഒട്ടേറെ അഭ്യൂഹങ്ങള് ഇതിനിടയില് പുറത്ത് വരുന്നുണ്ട്. അതേസമയം, ഇത് അവിടെയുള്ള വലിയ പാറകളില് ഏതെങ്കിലുമാകുമെന്നും ഈ പറയുന്ന ദുരൂഹതയൊന്നും ഇതിനില്ലെന്നും ഒരു വിഭാഗം ശാസ്ത്രജ്ഞര് വാദിക്കുന്നു. റോവര് കൂടുതല് അടുത്തെത്തുന്നതോടെ വിചിത്ര വസ്തുവിന്റെ യഥാര്ഥ സത്യം പുറത്തു വരുമെന്നാണു ശാസ്ത്രജ്ഞരുടെ പ്രതീക്ഷ. ചന്ദ്രന് സ്വന്തം അച്ചുതണ്ടില് ചുറ്റുന്നതിന്റെയും ഭൂമിയെ ഭ്രമണം ചെയ്യുന്നതിന്റെയും തോതുകളുടെ പ്രത്യേകത മൂലം ചന്ദ്രന്റെ ഒരു വശം മാത്രമേ നമുക്ക് കാണാന് സാധിക്കൂ. കാണാന് സാധിക്കാത്ത വശമാണ് ഫാര് സൈഡ് അഥവാ അജ്ഞാത വശമെന്ന് അറിയപ്പെടുന്നത്.
വിഖ്യാത ഹോളിവുഡ് സംവിധായകന് സ്റ്റാന്ലി കുബ്രിക് തന്റെ കള്ട്ട് ക്ലാസിക്കായ 2001- എ സ്പേസ് ഒഡീസി എന്ന ചിത്രത്തില് ഒരു ചതുര ബീം കാണിക്കുന്നുണ്ട്. മനുഷ്യരുടെ പരിണാമത്തിനു വേഗം പകര്ന്നതും മനുഷ്യര്ക്ക് ബുദ്ധി കിട്ടിയതുമൊക്കെ ഈ ബീമില് നിന്നാണെന്നാണ് ആ ചിത്രം പറഞ്ഞുവെക്കുന്നത്. ഇത്തരത്തിലൊരു ബീമാണ് ഇതെന്നാണ് ചില നിഗൂഢസിദ്ധാന്തക്കാരുടെ വാദം.