നവംബര്‍ 12ന് റിലീസ് ചെയ്ത ദുല്‍ഖര്‍ സല്‍മാന്‍ ചിത്രം ‘കുറുപ്പ്’ 75 കോടി കളക്ഷന്‍ നേടി മുന്നേറുകയാണ്. അഞ്ച് ദിവസം കൊണ്ട് ചിത്രം അമ്പത് കോടി കളക്ഷന്‍ നേടിയിരുന്നു. ഇപ്പോള്‍ ചിത്രം മുപ്പത്തിഅയ്യായിരത്തിലധികം ഷോകളും പൂര്‍ത്തിയാക്കി. 75 കോടി ചിത്രം നേടിയതായി ദുല്‍ഖര്‍ തന്നെ സോഷ്യല്‍ മീഡിയയിലൂടെ അറിയിച്ചു.
”എല്ലാ പ്രേക്ഷകര്‍ക്കും നന്ദി. ഞങ്ങള്‍ പ്രാര്‍ത്ഥനയോടെ റിലീസ് ചെയ്ത ചിത്രത്തെ നിങ്ങള്‍ പ്രേക്ഷകര്‍ സ്‌നേഹത്തോടെ സ്വീകരിച്ചു”, ദുല്‍ഖര്‍ ഫേസ്ബുക്കില്‍ കുറിച്ചു.
ചിത്രം 505 സ്‌ക്രീനില്‍ 2600ലേറെ ഷോകളാണ് ആദ്യ ദിനം നടത്തിയത്. പലയിടത്തു0 12 മണിക്ക് ശേഷവും അധിക ഷോകള്‍ നടത്തുകയും ചെയ്തു. കേരളത്തിലെ തിയേറ്ററുകള്‍ പഴയ പോലെ സജീവമായിരിക്കുകയാണ് ദുല്‍ഖറിന്റെ കുറുപ്പിലൂടെ. ഒടിടി റിലീസ് ചെയ്യാനിരുന്ന ചിത്രമാണ് തിയേറ്റര്‍ റിലീസിലേക്ക് മാറിയത്. 35 കോടി ബജറ്റില്‍ ആണ് ചിത്രം ഒരുക്കിയത്. ചിത്രത്തിന്റെ കഥ ഒരുക്കിയിരിക്കുന്നത് ജിതിന്‍ കെ ജോസ് ആണ്. തിരക്കഥയും സംഭാഷണവും ഒരുക്കിയിരിക്കുന്നത് ഡാനിയേല്‍ സായൂജ് നായരും കെ എസ് അരവിന്ദും ചേര്‍ന്നാണ്. ചിത്രം നിര്‍മിച്ചിരിക്കുന്നത് ദുല്‍ഖര്‍ സല്‍മാന്റെ ഉടമസ്ഥതയിലുള്ള വേഫെയറര്‍ ഫിലിംസും എം സ്റ്റാര്‍ എന്റര്‍ടെയ്ന്‍മെന്റ്‌സും ചേര്‍ന്നാണ്. മലയാളത്തിന് പുറമെ തമിഴ്, തെലുങ്ക്, ഹിന്ദി, കന്നഡ ഭാഷകളിലും ചിത്രം പ്രദര്‍ശനത്തിന് എത്തും .