ദുല്ഖര് സല്മാന് നായകനായ ബിഗ് ബജറ്റ് ചിത്രം ‘കുറുപ്പ്’ റിലീസ് ചെയ്ത് 5 ദിവസങ്ങള് കൊണ്ട് അന്പത് കോടി ക്ലബ്ബില് ഇടം പിടിച്ചു. ‘കുറുപ്പി’നെ ഇരുകയ്യും നീട്ടി സ്വീകരിച്ച പ്രേക്ഷകര്ക്ക് നന്ദിയുണ്ടെന്നും ഇത് കൂട്ടായ്മയുടെ വിജയമാണെന്നും ദുല്ഖര് സല്മാന് അറിയിച്ചു.
കേരളത്തില് 505 സ്ക്രീനുകളില് പ്രദര്ശനത്തിനെത്തിയ ചിത്രം ആദ്യ ദിവസം തന്നെ നേടിയത് ആറരക്കോടി രൂപയാണെന്ന് ഫിയോക് പ്രസിഡന്റ് കെ. വിജയകുമാര് വെളിപ്പെടുത്തിയിരുന്നു. കേരളത്തില് മാത്രം ആദ്യദിനം രണ്ടായിരത്തി അറുനൂറിലധികം ഷോ നടന്നു. ചെന്നൈ സിറ്റിയില് നിന്നും മാത്രം ആദ്യദിനം പത്ത് ലക്ഷം രൂപയാണ് ചിത്രം കലക്ട് ചെയ്തത്.
ലോകമാകെ 1500 സ്ക്രീനുകളിലായിരുന്നു റിലീസ്. 50 ശതമാനം സീറ്റുകളില് മാത്രമാണ് കാണികളെ അനുവദിച്ചിട്ടുള്ളതെങ്കിലും ‘കുറുപ്പി’ന്റെ പ്രദര്ശനങ്ങളെല്ലാം ഹൗസ്ഫുള് ആയിരുന്നു.
തിയേറ്ററുകള്ക്ക് വീണ്ടും ഉണര്വേകാന് കോവിഡ് നിയന്ത്രണങ്ങള്ക്ക് ശേഷമെത്തിയ ‘കുറുപ്പി’നു കഴിഞ്ഞു. ശ്രീനാഥ് രാജേന്ദ്രന് സംവിധാനം നിര്വഹിച്ച കുറുപ്പിന്റെ ബജറ്റ് 35 കോടിയാണ്. ദുല്ഖര് സല്മാന്റെ ഉടമസ്ഥതയിലുള്ള വേഫാര് ഫിലിംസും എം സ്റ്റാര് എന്റര്ടെയ്ന്മെന്റ്സും ചേര്ന്നാണ് നിര്മാണം. മൂത്തോന് എന്ന ചിത്രത്തിലൂടെ മലയാളത്തിലേക്ക് അരങ്ങേറ്റം കുറിച്ച ശോഭിത ധുലിപാലയാണ് ചിത്രത്തിലെ നായിക. ഇന്ദ്രജിത് സുകുമാരന്, സണ്ണി വെയ്ന്, ഷൈന് ടോം ചാക്കോ, വിജയരാഘവന്, പി. ബാലചന്ദ്രന്, സുരഭി ലക്ഷ്മി, ശിവജിത് പത്മനാഭന് തുടങ്ങിയവരും അഭിനയിക്കുന്നുണ്ട്.