ന്യൂഡൽഹി: കേന്ദ്ര സർക്കാരിനെതിരെ രൂക്ഷ വിമർശനവുമായി കോൺഗ്രസ് നേതാവ് രാഹുൽ ഗാന്ധി. ദേശീയ സുരക്ഷാ വിഷയത്തിൽ കേന്ദ്ര സർക്കാർ വിട്ടുവീഴ്ച ചെയ്തെന്നാണ് രാഹുൽ ഗാന്ധിയുടെ ആരോപണം. ചൈന തർക്കവിഷയത്തിൽ കേന്ദ്ര സർക്കാരിന് ഒരു നയമില്ലെന്ന് അദ്ദേഹം കുറ്റപ്പെടുത്തി. ചൈനാ വിഷയത്തിൽ ചീഫ് ഓഫ് ഡിഫൻസ് സ്റ്റാഫ് വിപിൻ റാവത്തിനും കേന്ദ്ര വിദേശകാര്യ മന്ത്രാലയത്തിനും രണ്ട് അഭിപ്രായമാണെന്ന പത്ര റിപ്പോർട്ട് ട്വിറ്ററിൽ സൂചിപ്പിച്ചു കൊണ്ടായിരുന്നു അദ്ദേഹത്തിന്റെ പരാമർശം.
പ്രധാനമന്ത്രി നരേന്ദ്ര മോദിയെ രാഹുൽ ഗാന്ധി പരിഹസിക്കുകയും ചെയ്തു. മിസ്റ്റർ 56 ഇഞ്ചിന് വിഷയത്തിൽ പേടിയാണെന്നായിരുന്നു പ്രധാനമന്ത്രിക്കെതിരെയുള്ള രാഹുൽ ഗാന്ധിയുടെ പരിഹാസം. കേന്ദ്ര സർക്കാർ സർക്കാർ നുണകൾ പ്രചരിപ്പിക്കുമ്പോൾ അതിർത്തി കാക്കാൻ ജീവൻ പണയപ്പെടുത്തി നിൽക്കുന്ന സൈനികർക്ക് വേണ്ടി താൻ പ്രാർത്ഥിക്കുന്നുവെന്നും അദ്ദേഹം പറഞ്ഞു.
ഇന്ത്യൻ അതിർത്തി കയ്യേറി അരുണാചൽ പ്രദേശിൽ ചൈന നൂറ് വീടുകളുളള ഗ്രാമം നിർമ്മിച്ചെന്ന് വ്യക്തമാക്കുന്ന രേഖകൾ നേരത്തെ പെന്റഗൺ പുറത്തുവിട്ടിരുന്നു. എന്നാൽ ഈ റിപ്പോർട്ടിനെ കേന്ദ്ര സർക്കാർ തള്ളിയിരുന്നു. ചൈനയുടെ തന്നെ സ്ഥലത്താണ് അവർ ഗ്രാമം നിർമ്മിച്ചതെന്നായിരുന്നു ഇന്ത്യയുടെ പ്രതികരണം. ചൈനീസ് അധിനിവേശത്തെ അംഗീകരിക്കില്ല എന്നായിരുന്നു ഇതേ വിഷയത്തിൽ വിദേശകാര്യ മന്ത്രാലയത്തിന്റെ പ്രതികരണം. തുടർന്നാണ് രാഹുൽ ഗാന്ധി വിമർശനവുമായി രംഗത്തെത്തിയത്.